Mesazhet me përmbajtje kërcënuese të cilat cak kishin ish bashkëshorten e tij, u bënë shkak të mërgimtarit nga Gjermania t’i ndalet udha për në pushim në gjysmë. 37-vjeçari i cili ishte në stop-listë që nga 3 dhjetori i vitit që lamë pas, u arrestua sot në pikën kufitare ‘Dheu u Bardhë’.
Burimet e Gazetës Sinjali brenda Prokurorisë bëjnë me dije se i dyshuari kishte dërguar mesazhe kërcënuese për ish bashkëshorten e tij në telefonat personal të fëmijëve të tyre të mitur.
E shqetësuar dhe e frikësuar nga fjalët e tij, 37-vjeçarja kishte denoncuar menjëherë rastin në Polici, çka ka bërë që njësitë policore të marrin veprimet hetimore që ndihmojnë në kapjen e të dyshuarit.
37-vjeçari pas arrestimit është shoqëruar në stacion policor ku është intervistuar nga hetuesit lidhur me veprën për të cilën dyshohet.
Pas përfundimit të procedurave policore, Prokurori i Shtetit ka nxjerrë aktvendim që atij t’i caktohet masa e ndalimit policor dhe i njëjti do të hetohet nën dyshimet për kryerjen e veprave penale ‘Dhunë në familje’ dhe ‘Kanosje’.
