140,000 rusë janë shpërngulur në Serbi që nga shkurti. Ky fluks ka ndryshuar veçanërisht Beogradin, gjithashtu imazhin e çuditshëm të Rusisë që kanë shumë serbë në jetën e përditshme.
Kështu shkruan gazeta gjermane “Frankfurter Allgemeine Zeitung” për ardhjen e rusëve në Serbi dhe për tensionet e reja në veri të Kosovës.
Gjatë muajve të fundit, Beogradi ka ndryshuar me një shpejtësi ndoshta të paprecedentë në historinë e tij të gjatë, të paktën jo që nga përmbysja e diktatorit Sllobodan Millosheviq 22 vjet më parë. Arsyeja për këtë është lufta në Ukrainë. Më saktësisht: Arsyeja për këtë është numri i madh i njerëzve nga Rusia që janë vendosur në kryeqytetin e Serbisë që nga pushtimi i fundit rus në Ukrainë.
Gazeta gjermane thotë se rusët shkuan nja dy herë në numër më të madh.
“Vala e parë arriti në Beograd menjëherë pas 24 shkurtit, kur filloi pushtimi i fundit i Rusisë në Ukrainë. Ai përbëhej kryesisht nga rusë të vendosur opozitarë, të cilët nuk mundën ose nuk donin të pajtonin ndërgjegjen e tyre me vazhdimin e jetesës në vendin e agresorit. Të tjerët erdhën kryesisht për arsye biznesi, sepse nuk donin të humbnin qasjen në tregje dhe banka të rrjetit global. Interesat pragmatike dhe neveria morale ndaj regjimit rus shpesh kombinohen. Ata donin që kompania e tyre të vazhdonte të punonte dhe nuk donin që djali i tyre të rritej në shoqërinë fashiste që Putin krijoi në Rusi, siç shpjegohet nga një çift i suksesshëm në sektorin e IT”.
Shumica e rusëve në Beograd nuk kanë probleme financiare, por disa serbë tani i kanë ato probleme, sepse për shkak të ardhjes së një numri të madh të rusëve çmimet e qirasë janë katërfishuar, shkruan FEZ.
Vala e dytë e emigracionit, siç u tha, filloi kur Putin shpalli mobilizimin më 21 shtator.
“Ajo valë nuk ka përfunduar ende, përkundrazi. Numri i shtetasve rusë të regjistruar në Serbi po rritet çdo ditë. Sipas të dhënave të Ministrisë së Punëve të Brendshme të Serbisë, më shumë se 140.000 qytetarë rusë e kanë regjistruar vendbanimin e tyre në Serbi, shumica prej tyre në Beograd”.
Në këtë artikull thuhet se sipas Ministrisë së Brendshme, në Beograd janë rreth 23 mijë ukrainas dhe rreth 5500 bjellorusë.
“Rusishtja është bërë gjuha e dytë e Beogradit dhe rusët janë pakica më e madhe në qytet”.
Kjo valë e dytë, siç vlerësohet nga Frankfurter Allgemeine Zeitung, konsiderohet më pak politike.
“Pjesë e kësaj vale janë edhe disa rusë që janë ndoshta më pak kundër Putinit dhe më shumë kundër efekteve që kanë politikat e tij mbi ta. Në çdo rast, ata nuk kanë ndërmend të humbasin jetën në fushën e betejës për Putinin”.
Gazeta flet se si ata janë angazhuar edhe në protesta.
“Një organizator i diasporës ruse thotë se disa rusë dhurojnë për protestat kundër Putinit, por janë të kujdesshëm që të mos dalin publikisht sepse kanë ende të afërm ose interesa biznesi në Rusi. Kujdesi i tyre është i kuptueshëm, duke qenë se shërbimi sekret serb së fundi është drejtuar nga Aleksandar Vulin, një politikan prorus dhe ndjekës besnik i presidentit Aleksandar Vuçiq. Ata nuk duan të ekspozohen në një vend, popullsia e të cilit i ka pritur krahëhapur, por politika e të cilit lëkundet”.
