Avokatët dhe analistët pajtohen se liderët e UÇK-së punësuan avokatë të profilit të lartë, me përvojë të gjerë.
Gazetari dhe shkrimtari gjerman Michael Mertens tha për Euronews Serbia se ata janë “avokatët më të mirë që mund t’i ketë ndokush”, përcjell Demokracia.com.
“Me sa kuptoj unë, Kosova ka ndarë 16 milionë euro nga buxheti për të gjithë të akuzuarit. Avokatët e Thaçit janë ekspertë të lartë,” vuri në dukje ai.
Me të pajtohet edhe avokati Tomislav Vishnjiq, i cili thotë se bëhet fjalë për më të mirët që mund të gjinden në treg në fushën e së drejtës penale ndërkombëtare. Secili nga katër të pandehurit ka mbrojtësin e vetë.
Vishnjiq, duke komentuar fjalët hyrëse, deklaroi se padyshim që mbrojtja e Thaçit do të kontrollojë të gjithë procedurën dhe do të mbajë peshën kryesore të mbrojtjes, dhe se ekipet e tjera do të kenë disa detyra ndihmëse.
Ekipi i Thaçit drejtohet nga avokatët që mbrojtën Gotovinën
Siç raporton mediumi, Hashim Thaçi ka ekipin më të madh të avokatëve. Përveç avokatit kryesor mbrojtës Gregory Kehoe, janë edhe gjashtë avokatë më me përvojë dhe të njohur, emrat e të cilëve janë veçanërisht të njohur në zonën e ish-Jugosllavisë.
Kehoe është avokat me më shumë se 30 vjet përvojë dhe në faqen e internetit të zyrës ligjore Greenberg Traurig thuhet se ai u fokusua në përfaqësimin e individëve, korporatave dhe institucioneve financiare përpara gjykatave federale, si dhe para gjykatave ndërkombëtare. Në krye të biografisë së tij shkruhet se ai përfaqësonte gjeneralin kroat Ante Gotovina para Gjykatës Ndërkombëtare për Krimet në ish-Jugosllavi.
Ai gjithashtu përfaqësoi gjeneralin kenian Mohammed Hussein Ali, i cili u lirua nga të gjitha akuzat para Gjykatës Penale Ndërkombëtare.
Ai punoi në Departamentin e Drejtësisë të SHBA-së si prokuror për më shumë se 20 vjet dhe terreni i tij ishte në SHBA, Evropë, Azi dhe Amerikën e Jugut. Kehoe kryesoi një ekip avokatësh dhe hetuesish që këshilluan gjykatën e posaçme ad hoc të ngritur për të gjykuar Sadam Huseinin dhe anëtarët e qeverisë së tij. Ai ishte pjesë e ekipit të Prokurorisë edhe në rastin kundër kolonelit të HVO-së, Tihomir Blashkiq, i cili u dënua me nëntë vjet burg.
Luka Mishetiq
Një emër tjetër në mbrojtjen e Hashim Thaçit, i cili në fakt ishte emri i parë gjatë mbrojtjes së Ante Gotovinës, është Luka Mishetiq. Ai lindi në Çikago në një familje emigrantësh kroatë dhe siç shkruan Jutarnji, në Kroaci nuk erdhi deri në moshën shtatëmbëdhjetë vjeçare. Në tekstin e vitit 2005, shkruhet se ai është takuar me Gotovinën gjatë përfaqësimit të komandantit lokal të njësisë së HVO-së, Ante Furundzija dhe se Gotovina e ka punësuar atë në vitin 2001, kur u bë e sigurt se ndaj tij po zhvillohej një hetim.
Në faqen e studios ligjore Squire Patton Boggs, thuhet se revista Globus e ka cilësuar atë si “një nga 100 kroatët më me ndikim”.
Ai ishte avokati kryesor mbrojtës i Ante Gotovinës dhe avokati më i ri që mbrojti ndonjëherë një çështje përpara Gjykatës Penale Ndërkombëtare, sipas biografisë së tij. Hrvatski Dnevnik shkruan gjithashtu se ai njihet për konflikte të ashpra verbale me ish-prokuroren e Gjykatës së Hagës, Carla del Ponte.
Pierre Richard Prosper, Peter McCloskey dhe Albert Moskowitz
Pierre Richard Prosper është një tjetër avokat i njohur në Ballkan. Në vitin 2001, ai u emërua nga Presidenti Bush si Ambasador i SHBA-së për Krimet e Luftës, i ngarkuar me këshillimin e drejtpërdrejtë të Sekretarit të Shtetit dhe formulimin e përgjigjeve të politikës amerikane ndaj krimeve në zonat e konfliktit në mbarë botën.
Si i dërguar i presidentit, ai udhëtoi në mbarë botën, si dhe qëndroi në Serbi. Vishnjiq njoftoi se ai shkoi në Beograd dhe se po zhvillonte negociata për dorëzimin me klientin e tij, gjeneralin Ojdaniq. Ai gjithashtu thotë se i ka ofruar Ojdaniqit të dëshmojë kundër Sllobodan Millosheviqit.
Peter McCloskey është gjithashtu anëtar i ekipit ligjor të Thaçit, dhe Vishnjiq vëren se ai ishte prokuror në të paktën katër raste kundër serbëve për krime në Bosnje dhe Hercegovinë, kryesisht në lidhje me Srebrenicën. Ai njihet për udhëheqjen e çështjes kundër Ratko Mlladiqit. Ai gjithashtu dha dëshmi në gjyqin e Slobodan Millosheviqit.
Ekipi përfshin edhe Albert Moskoviq, avokat amerikan i cili ishte drejtor i Departamentit të Drejtësisë së UNMIK-ut në Kosovë gjatë viteve 2006 dhe 2007.
Në një intervistë të mëvonshme, Moskoviq e përshkroi rolin e tij në Kosovë si “ministër i drejtësisë” në misionin e OKB-së. Në konferencën e lamtumirës për shtyp në Prishtinë në mars të 2007-ës, Moskoviq theksoi se “përmirësimi i mbrojtjes së dëshmitarëve dhe viktimave në Kosovë është i një rëndësie vendimtare”.
Ylli i mbrojtjes i gjyqësorit britanik
Përfaqësuesi kryesor i Kadri Veselit është një emër i njohur në fushën e të drejtës penale ndërkombëtare, Ben Emmerson, për të cilin Vishnjiq thekson se është një yll i sistemit britanik të drejtësisë penale. Ai ishte avokati kryesor i Ramush Haradinajt dhe në ekipin e tij janë avokatë me shumë përvojë.
Në biografinë e tij të pasur, Emerson përfaqësonte disa figura të rëndësishme politike, si ish-presidenti i Maldiveve Mohamed Rashid, ish-kryeministri ukrainas Arseniy Yatsenyuk dhe ish-udhëheqësi katalanas Carles Puigdemont. Ish-kryeministrja Theresa May e përshkroi Emerson si një nga avokatët më të respektuar të Mbretërisë së Bashkuar në fushën e ligjit kombëtar dhe ndërkombëtar.
Ai gjithashtu përfaqësoi themeluesin e WikiLeaks, Julian Assange, kur ai u ekstradua në Suedi.
Kush është në skuadrën e Rexhep Selimit dhe Jakup Krasniqit?
Rexhep Seljimi do të përfaqësohet në gjykatë nga avokati britanik David Young, specialiteti i të cilit është e drejta penale. Një nga rastet e tij më të mëdha është mbrojtja e Assad Hassan Sabra, i cili u akuzua për përfshirje në vrasjen e ish-kryeministrit libanez Rafik Hariri. Sabra përfundimisht u lirua nga ato akuza.
Young udhëheq një ekip të gjerë avokatësh të përfshirë në mbrojtjen e personave të akuzuar në Gjykatën Penale Ndërkombëtare, në Gjykatën Penale Ndërkombëtare për ish-Jugosllavinë, në gjykatën në Ruandë, në Dhomat e Specializuara të Kosovës etj.
Kur bëhet fjalë për mbrojtjen e Krasniqit, ajo drejtohet nga një avokate nga Malajzia; Venkateshwari Alagendra. Vishnjiq thotë se motra e saj ishte kryeprokurore e Gjykatës Ndërkombëtare Penale dhe se zyra e saj është e përfshirë në të gjitha rastet kryesore në Azi dhe Afrikë në lidhje me shkeljet e të drejtave të njeriut.
