Presidenti i Serbisë, Aleksandër Vuçiç, në një intervistë për prestigjiozen britanike “Reuters”, ka thënë se autoritet e Kosovës “duhet të bëjnë disa lëshime për të siguruar pjesëmarrjen e serbëve” në një palë zgjedhje të reja në katër komunat në Veri të Kosovës, pas atyre të 23 prillit, të cilat ishin bojkotuar nga serbët lokalë dhe përfaqësuesit e tyre politik.
“Ne ende nuk kemi një Asociacion të Komunave me Shumicë Serbe, ende nuk ka tërheqje të forcave speciale të policisë së Kosovës dhe kryetarëve të komunave atje”, ka deklaruar ai.
Tutje, kreu i Serbisë, ka kërkuar nga Kosova që të mos organizohen zgjedhje të reja në Veri, sipas tij “derisa t’u jepet më shumë autonomi” serbëve të Kosovës.
“Të gjithë serbët në Veri mendojnë për Serbinë si vendin e tyre, jo Kosovën. Ky është realiteti”, pretendoi Vuçiç, duke shtuar se “dikush duhet të marrë një kontroll dhe të organizojë një palë zgjedhje (të reja) atje”.
Ndërkaq, Vuçiç theksoi se “serbët e Kosovës janë gjithmonë të gatshëm të bisedojnë, por ju duhet t’u ofroni atyre diçka”.
Duke iu kundërpërgjigjur presidentes së Kosovës, Vjosa Osmani, e cila potencoi në një intervistë për “Reuters”, se Kosova mund të zhvillojë zgjedhje të reja në komunat Veriore “nëse 20% e votuesve nënshkruajnë një peticion duke i kërkuar ato”, presidenti serb deklaroi se “është e tmerrshme ajo për të cilën ata njerëz po flasin”, madje ai akuzoi kryeministrin e Kosovës, Albin Kurti, se “nuk ishte i gatshëm për kompromis”.
“Jam i sigurt që Kurti nuk do të investojë asnjë minutë nga koha e tij dhe as një pikë djerse për të gjetur një zgjidhje kompromisi”, pretendon ai.
Pas tensioneve të krijuara në Veri të Kosovës, Vuçiç ngriti në gjendje gatishmërie ushtrinë serbe, mirëpo për prestigjiozen britanike ka potencuar se është duke “e shqyrtuar” nëse do ta ulë Serbia gatishmërinë e saj luftarake.
“Ne do t’i mbajmë trupat tona në gatishmëri të lartë, jo në gatishmërinë më të lartë luftarake, sepse kjo kushton shumë”, shtoi ai.
