Lajmin e ka bërë të ditur kryeministri Kurti në mbledhjen e sotme të Qeverisë.
Kurti ka thënë se bazuar në vlerësimet e institucioneve të sigurisë të Kosovës dy formacione ilegale, “Mbrojtja Civile” dhe Brigada e Veriut”, paraqesin kërcënim të drejtpërdrejtë dhe serioz për rendin kushtetues dhe sigurinë në Republikën e Kosovës, shkruan gazeta online Reporteri.net.
“Bazuar në vlerësimet e institucioneve të sigurisë të Kosovës dy formacione ilegale, “Mbrojtja Civile” dhe Brigada e Veriut”, paraqesin kërcënim të drejtpërdrejtë dhe serioz për rendin kushtetues dhe sigurinë në Republikën e Kosovës. Për këtë e nisur nga fakti që kërcënimi juridik e kushtetues i rendit tonë është i pakompromis, e në veçanti duke pasur për qëllim mbrojtjen e të gjithë qytetarëve të Republikës tonë nga veprimet terroriste, duke përfshirë, por duke mos u kufizuar në sulmet e armatosura ndaj policisë, EULEXIT e KFOR, sulmet ndaj qytetarëve, pengimi i lëvizjes së lirë, detyrimi i qytetarëve për të marrë pjesë në protesta, barrikada e të tjera, kanosje dhe frikësim i qytetarëve në veri, subjekteve politike e kandidatëve, Mbrojtja Civile dhe Brigada e Veriut shpallen organizata terroriste në Republikën e Kosovës”, tha Kurti ndër të tjera.
Ndërkaq Ministri i Brendshëm, Xhelal Sveçla shtoi se aktivitetet e këtyre grupeve janë tërësisht kriminale, cenojnë rëndë rendin kushtetues dhe përmes shantazheve pengojnë bashkëpunimin e qeverisë me qytetarët serbë në Kosovë.
Sveçla ka thënë se vendimi për shpalljen terroriste të organizatave “Mbrojtja Civile” (Civilna Zashtita) dhe “Brigada e Veriut” (Severna Brigada), do të hyjë në fuqi menjëherë.
Ai shtoi se ka dëshmi që këto dy organizata kanë kryer sulme terroriste në Kosovë.
“Këto grupe me strukturë të mire organizuar kanë pjesëtarë të mirëpërgaditur për kryerjen e akteve terroriste, të armatosur dhe me burime financiare të mjaftueshme për realizmin e qëllimeve të tyre. Këto grupe e kërcënojnë sigurinë shtetërore me veprimet të ndërmarra brenda territorit por edhe jashtë kufijve të Kosovës. Përmes këtij vendimi, në mënyrë të menjëhershme ndalohet veprimtaria e këtyre grupeve sipas vendimit të Qeverisë”, ka thënë ai.
Ministri i Punëve të Brendshme Xhelal Sveçla tha se për këtë vendim janë koordinuar me partnerët ndërkombëtar.
“Ne në vazhdimësi koordinohemi me të gjithë aleatët tanë, disa herë pajtohemi disa herë nuk pajtohemi. Patjetër që për ketë hap ne jemi koordinuar”- tha ai gjatë një konference për media pas vendimit
