Me lot në sy e kujton momentin më të vështirë të jetës së tij, ditën kur u nda nga më të dashurit – nxënësit e tij.
Këtë ndarje, mësimdhënësi Lush Krasniqi ka thënë se ia bëri kryekëput drejtori i shkollës, Lekë Hajdaraj, me të cilin kishte mosmarrëveshje qysh prej kohës kur ky erdhi në këtë pozitë, në vitin 2021.
Krasniqi, i cili deri në janar të 2025-ës punoi në shkollën fillore “Ardhmëria” në Ramoc të Gjakovës, ka thënë se ballafaqimet si në shkollë e edhe në komisione disiplinore i kishte të vazhdueshme me drejtorin Hajdaraj, raporton Kiks Kosova.
Sipas mësuesit, drejtori kishte bërë një plan tjetër, që ta largonte përfundimisht nga shkolla që ai e drejtonte, duke ia përgatitur një grackë, kësaj radhe siç thotë mësuesi, të përmasave të mëdha.
Historia më e ashpër mes tyre nisi në vitin 2024, kur drejtori vendosi ta lajmërojë në polici mësuesin Krasniqi me akuzat për ngacmim seksual, duke pretenduar se mësuesi po bezdiste koleget.
Këtu arsimtari thotë se përjetoi shokun më të madh në jetë.
Kjo gjë bëri që komuna të marrë një vendim për suspendim të tij më 3 maj të 2024-tës, pasi që Prokuroria nisi hetimin ndaj këtij rasti të ndjeshëm.
18 ditë më pas, më 21 maj, Gjykata Themelore në Gjakovë pushoi hetimet duke qenë se mori njoftimin nga Prokuroria se dëshmitaret, në këtë rast koleget e mësuesit Lush Krasniqi, nuk iu bashkëngjiten ndjekjes penale.
Duke qenë kështu, mësuesi u shfajësua nga këto akuza dhe hoqi një barrë të rëndë nga supet e tij.
Menjëherë pas këtij vendimi, më 10 qershor, me vendim të Komunës së Gjakovës, mësuesi u kthye në vendin e tij të punës.
Nën arsyetimin e cenimit të integritetit, Lush Krasniqi ushtroi padi për kompensim dëmi ndaj drejtorit të shkollës Lekë Hajdaraj.
Detajet e këtij rasti i gjeni në kronikën në vijim:
