Avokatja e Jakup Krasniqit në Hagë, Venkateswari Alagendra, ka dhënë përgjigje për Klan Kosova, rreth procesit gjyqësor të klientit të saj.
Ajo thotë se për Krasniqin, rruga e tij drejt drejtësisë ka qenë e gjatë dhe e mbushur me plot sfida, derisa shton se për mbi katër vjet, mbrojtja ka qenë e palëkundur në përkushtimin e saj për të vërtetën dhe drejtësinë, transmeton Gazeta Papirus.
“Për Z. Jakup Krasniqi, rruga drejt drejtësisë ka qenë e gjatë dhe e mbushur me plot sfida. Duhet të theksohet se kanë kaluar gati katër vjet e gjysmë që kur klienti im është arrestuar, përfshirë fazën e procedurës paraprake të gjykimit dhe dy vjet të plota që kur ka nisur gjykimi. Përgjatë kësaj periudhe, mbrojtja ka qenë e palëkundur në përkushtimin e saj për të vërtetën dhe drejtësinë. Që nga fillimi i gjykimit, strategjia jonë ligjore ka qenë e bazuar në fakte, ligj dhe integritet. Gjatë paraqitjes së rastit të prokurorisë, ne vazhdimisht kemi mbajtur dhe vërtetuar qëndrimet që kemi prezantuar në fjalën hyrëse. Ato qëndrime mbesin të palëkundura”, tha Alagendra.
Tutje, për Klanin, Alagendra tha se Mbrojtja mbetet e palëkundur në bindjen se drejtësia do të triumfojë dhe aktgjykimi përfundimtar do ta vërtetojë pafajësinë e Krasniqit.
“Duke iu afruar përmbylljes formale të rastit të prokurorisë gjatë ditëve të ardhshme, edhe ne do të vazhdojmë me hapat tjerë procedural siç parashihet me rregullore. Ne jemi të përkushtuar për t’u siguruar që këta hapa të përmbushen pa vonesë ashtu që verdikti përfundimtar të merret sa më parë që është e mundur. Ne mbesim të palëkundur në bindjen tonë se drejtësia do të triumfojë dhe aktgjykimi përfundimtar do ta vërtetojë pafajësinë e Z. Krasniqi”, tha ajo.
