Politikania franceze, Marine Le Pen, u shpall fajtore për shpërdorim të fondeve evropiane, me qëllim financimin e partisë së saj të ekstremit të djathtë, Tubimi Kombëtar.
Gjykata ia ndaloi të mbajë poste publike për pesë vjet, çfarë do të thotë se ajo nuk do të mund të kandidojë në zgjedhjet presidenciale të Francës në vitin 2027.
Vitin e kaluar, prokurorët thanë se dënimi i Le Penit nuk duhet të jetë vetëm me gjobë prej 300.000 eurosh dhe burgim, por edhe me pamundësinë për të garuar për poste publike për pesë vjet, raporton Radio Evropa e Lirë.
Le Pen u akuzua, së bashku me më shumë se 20 figura të tjera të larta partiake, për punësimin e asistentëve që punonin për partinë e saj dhe jo për Parlamentin Evropian, që i paguante.
Gjatë gjyqit vitin e kaluar, ajo mohoi se kishte kryer “parregullsinë më të vogël”.
Media si BBC raportojnë se Le Pen e lëshoi sallën e gjyqit përpara se t’i shqiptohej dënimi.
