Me rastin e Ditës së Europës, kryetari i Bashkimit Demokratik për Integrim, Ali Ahmeti ka shkruar në faqen e tij zyrtare në Facebook se ky përvjetor e gjen Maqedoninë e Veriut dhe vendet e rajonit më afër BE-së.
Ahmeti ndër të tjera ka uruar progres në rrugën europiane të Maqedonisë së Veriut.
Statusi i plotë:
Themelimi i Bashkimit Europian 73 vite më parë ishte bashkim forcash dhe vlerash në kohën e duhur për të trasuar rrugën e paqes dhe zhvillimit.
Ajo frymë progresive pati ndikim të jashtëzakonshëm edhe në konsolidimin demokratik të trojeve tona dhe ky përvjetor gjen vendin tonë dhe mbarë rajonin më afër dyerve të Europës, me negociata të hapura të integrimit.
Sot le të reflektojmë bashkë mbi kronologjinë e vendimeve të guximshme që kemi ndërmarrë për të ndërtuar paqen mbi lirinë e barazinë si vlerë, për të zgjidhur kontestet me fqinjët, për të hapur horizonte të reja zhvillimi në çdo segment të jetës.
Duhet të përshpejtojmë medoemos hapin drejt integrimit në Bashkimin Europian. Armiku ynë më i madh është stagnimi i proceseve të ardhmërisë europiane të vendit. Prandaj, le të bëhemi bashkë në frontin për Europë dhe le të avancojmë proceset e nevojshme me guxim dhe pjekuri.
Bashkë për Europë!
