ish-komandanti i UÇK-së në Zonën Operative të Drenicës, Sami Lushtaku, ka përkujtuar Komandant Ilaz Kodren, në përvjetorin e renjes.
Postimi tij i Plotë:
Sot, në 23 vjetorin e rënies, kujtojmë njërin nga Komandantët më të shquar të Ushtrisë Çlirimtare të Kosovës, burrin e urtë e luftëtarin e orëve të para, heroin e kombit, Ilaz Kodra. Ilazi ishte prej organizatorëve të parë në themelimin e UÇK-së, një djalë trim, fjalëpak por vizionar i madh. Duke e njohur që nga fëmijëria, ai gjithë jetën e kaloi në shërbim të vendit. Ishte aksionist i hershëm, duke punuar shumë në formimin e radhëve të UÇK-së. Pas rënies së Komandantit Fehmi Lladrovci, Ilazi ka udhëhequr Brigadën 114 në Zonën Operative të Drenicës, deri në rënien e tij me 30 Prill 1999, në mbrojtje të popullatës civile.
Sot, tek Kulla e Ilaz Kodrës në Prekaz, në Memorialin e Dëshmorëve në Marinë, në Verbofc, Shtuticë, Qirez, Likoshan e në Baks, pranë varreve të dëshmorëve e martirëve të luftës së UÇK-së, nderuam 40 dëshmorët dhe 275 martirët që ranë në ofensivën famëkeqe serbe të 30 Prillit 1999.
Falë sakrificës sublime të dëshmorëve e martirëve, ne sot gëzojmë lirinë dhe pavarësinë e shtetit tonë.
Lavdi përjetë jetës dhe veprës së Komandantit Ilaz Kodra, 39 dëshmorëve e 275 martirëve të rënë me 30 Prill 1999!
SL
