Ish Drejtori i Radio Kosovës, Ernest Luma, i cili u shkarkua këto ditë ka reaguar nëpërmjet rrjetit social Facebook.
Statusi i tij :
Përpjekjet e Nikola Teslas, në vitin 1893, për radiokomunikimin e parë dhe konkretizimi i tyre nga ai që njihet si babai i radios, Guglielmo Marconi, në vitin 1901, në Angli, njihen si komunikimet e para radiofonike.
Radioja e parë, si medium, startoi në vitin 1920, e lejuar nga qeveria e Anglisë.
Ndërkaq, në ditën e sotme të vitit 1946, Kombet e Bashkuara themeluan radion e parë zyrtare. Që atëherë, 13 Shkurti është shënuar si Dita Botërore e Radios.
Andaj, në këtë ditë të veçantë, urimet shkojnë për të gjithë pasionantët dhe entuziastët e radiogazetarisë, profesionistët e kësaj fushe kudo që janë e, veçanërisht, për kolegët e radios së vetme nacionale në vendin tonë – pra, Radio Kosovës I dhe II, si njësi e tërësisë mediale të Radiotelevizionit të Kosovës (RTK)!
Njëkohësisht, i uroj të gjithë ata kolegë që nuk janë aktualisht pjesë e institucionit tonë, pas pensionimit, dhe i kujtoj me respekt shumë emra të tjerë që ndërkohë janë ndarë nga jeta, por që me punën dhe përkushtimin e tyre kanë lënë gjurmë, me vite e dekada, për ta bërë Radio Kosovën kjo që është sot – radio me vlerë dhe mediumi më i besueshëm në vend.
P.s.: Në mesnatën e pak ditëve më parë, nga mediet kuptova se sapo isha shkarkuar nga pozita e drejtorit të RTK-Radios. Për mendimin tim, u shkarkova krejt padrejtësisht dhe me motive krejtësisht politike, pak më shumë sesa një vit që kur isha zgjedhur në atë pëgjegjësi.
Sidoqoftë, erërat politike shkojnë e vijnë. Ndëhyrjet dhe shkarkimet e tilla në këtë institicion kanë ndodhur edhe në kohë shumë më të herëshme.
Megjithatë, kjo nuk është rruga për të ndërtuar barazi, as shoqëri të të barabartëve e as drejtësi. Ndoshta edhe është. Apo, ndoshta edhe nuk është (Çka po di!)
Por, shkarkuesit dhe poltikat kanë shkuar, Radio-Kosova ka mbetur.
Ne fund të fundit, secili jemi përpjekur ta bëjmë dhe do ta bëjmë punën tonë, ashtu siç është më së miri.
Sot dua t’i përgëzoj e t’i falënderoj të gjithë kolegët e Radio-Kosovës për punën që bëjnë: Ju, jeni ata që e keni ngritur këtë medium publik, që edhe sot, si edhe para dy dekadash, vazhdon të jetë më i besueshmi!
Besueshmëria e ka një emër: Radio-Kosova!
Radio Kosova është e Kosovës.
Urime, gjithësecilit Ditën Ndërkombëtare të Radios!
/Gazeta Papirus/
