Futbollisti i Hajdukut të Splitit, Emir Sahiti e ka pranuar ftesën e Kombëtares së Kosovës.
Ai, pas takimit të sotëm me presidentin e FFK-së Agim Ademin, e ka nënshkruar shkresën nëpërmjet të cilës do t’i kompletohet dokumentacioni i nevojshëm për t’u paraqitur në fanellën e “Dardanëve”.
Emir Sahiti në të kaluarën ka luajtur për ekipin kombëtar të Shpresave të Shqipërisë, kurse tani dëshira e tij është që ta përfaqësojë Kosovën.
E për vendimin e Emir Sahitit t’i thotë “Po” Kosovës është marrë edhe mediumi serb “Telegraf.rs”.
Ata në një artikull të publikuar kanë shkruar për vendlindjen e Emir Sahitit, ndërsa si zakonisht të njohur për skandale, ata kanë shkruar se Sahiti që ka lindur në Zemun (Serbi) ka vendosur të luajë për “të ashtuquajturën Kosovë”.
“Një futbollist i lindur në Zemun ka vendosur të luajë për të ashtuquajturën Kosovë”, thuhet në titullin e artikullit të mediumit serb.
Ndryshe, futbollisti më i ri i Kombëtares së Kosovës aktivizohet te skuadra kroate e Hajdukut të Splitit.
