Kreu i Drenasit, Ramiz Lladrovci, ka reaguar ndaj shpalljes së rrezikut nga presioni i Serbisë, duke theksuar se Kosova ka fituar luftën ndaj Serbisë dhe gjithashtu ka fituar gjyqin në GjND për ligjshmërinë e Pavarësis, transmeton Gazeta Papirus.
Ai për GazetaBlic e cilëson si të paarsyeshme këtë frikë dhe e konsideron të padrejtë presionin ndaj deputetëve të pakicës jo serbe, të cilët po etikohen me formulën e rrezikshme “kush nuk e voton Kurtin është me Serbinë.”
“Si pjesëmarrës dhe kontribuues i politikës lokale e qendrore, kam dhënë opinionin tim lidhur me prirjet e disa aktorëve politikë. Opinioni im, deri tash nuk është demantuar, përkundrazi. Jam i befasuar me shpalljen e djeshme të rrezikut nga presioni i Serbisë”.“Ne e kemi fituar luftën ndaj tyre, ashtu siç e fituam gjyqin në GjND për ligjshmërinë e Pavarësisë, andaj e shoh si frikë të paarsyeshme në këtë kohë nga ai drejtim. Mendoj se është e padrejtë dhe e pandershme t’i bëhet presion deputetëve të pakicës jo serbe të cilët që me automatizëm po vihen nën ndikimin Serbisë me formulën e rrezikshme kush nuk e voton Kurtin është me Serbinë (kujto këtu propagandën e VAG – Vetëvendosje, Alternativë e Guxo në Maqedoninë e Veriut, etj.)”, tha Lladrovci.
Lladrovci gjithashtu ka theksuar se, për shkak të sfidave që po kalon Kosova, VAG dhe Nisma nuk kanë mjaftueshëm vota për të krijuar një unitet të qëndrueshëm, duke shtuar se mund të kemi zgjedhje të reja.Ai ka shprehur shqetësim edhe për mundësinë e keqpërdorimit të emrave të familjeve për të komprometuar opozitën në zgjedhjen e Presidentit.
“Me sfidat që ka Kosova, VAG dhe Nisma, nuk kanë mjaft vota për të krijuar unitet të mëtejmë dhe shpejt mund të kemi zgjedhje të reja. Në rastin e Presidentit ky Koalicion ka gjasa të keqpërdorë ndonjë emër të një familjeje për president me qëllim të komprometimit të opozitës e cila pritet ta kundërshtojë propozimin e këtij koalicioni. Koalicioni fundja flet për vetë kreatorët e saj, pushtet me çdo kusht”, përfundoi Lladrovci.
