Kryetari i Komunës së Drenasit, Ramiz Lladrovci, ka bërë me dije se sot e ka kuptuar se nuk do të ndërtohet rruga me katër korsi, nga Komorani deri në fshatin Gllobar.
Ai ka bërë me dije se arsyet e Qeverisë në lidhje me mosndertimin e kësaj rruge nuk qëndrojnë.
Në profilin e tij në “Facebook”, ai ka shkruar se asnjë pengesë nuk ekziston për zhvillimin e projektit me katër korsi, Komoran-Drenas- (Gllobar)- Skenderaj.
“Në prag të fushatave zgjedhore, është e kuptueshme që niveli qendror me militantët lokalë tentojnë t’ia rrisin vetes meritat për projektet e realizuara. Është i pranishëm fenomeni i mashtrimit ku planifikimi vlerësohet si punë e realizuar. Sot e mora vesh se nuk po ndërtohet rruga me katër korsi, nga Komorani deri në Glloobar gjoja se kjo rrugë “nuk është e shpronësuar”. Kjo temë, e nxitur në Kuvendin e Drenasit, ku pretendimi i opozitares së Vetëvendosjes, ka për synim që të pavërtetën ta shpallë si të vërtetë”, ka shkruar ai, duke dhënë sqarime tjera.
“Asnjë pengesë nuk ekziston për zhvillimin e projektit me katër korsi, Komoran-Drenas- (Gllobar)- Skenderaj. Nga drejtimi i Skenderajt deri në Gllobar është finalizuar. Kanë mbetur edhe rreth 9.200 metra gjatësi e papërfunduar. Rruga magjistrale Komoran-Drenas-Skenderaj është e shpronësuar në vitet ’70, është azhurnuar pjesa grafike në vitin 2018. Me një klikim të thjeshtë, në gjeoportal, kjo lehtësisht mund të verifikohet”, ka vlerësuar ai.
Poashtu sipas tij, në 5 vitet e fundit nuk është punua fare për këtë rrugë.
