Është liruar nga paraburgimi Valon Hoti, njëri nga të arrestuarit në rastin e njohur si “Subvencionet”. Hoti, i cili mbante pozitën e Inspektorit të Tregut në Podujevë, ishte arrestuar në aksionin e korrikut, që ishte zhvilluar në Agjencinë për Zhvillimin e Bujqësisë, në kuadër të ministrisë së Bujqësisë, shkruan “Insajderi”.
Gjashtë muaj më pas, Gjykata Themelore në Prishtinë ka vendosur që Hoti të lirohet nga masa e paraburgimit, dhe e njëjta t’i zëvendësohet me masën e arrestit shtëpiak. Ky vendim, deri në një të radhës, do të vlejë nga 6 deri më 24 janar 2022. Vendimin për ndërprerjen e paraburgimit e ka konfirmuar edhe avokati i tij, Ahmet Tahiri.
“Klientit tim i është ndërprerë paraburgimi. I është zëvendësuar me arrest shtëpiak”, ka thënë Tahiri. Ndryshe, Hoti ishte në mesin e 21 personave të arrestuar në aksionin e korrikut, që ishte zhvilluar në Prishtinë, Podujevë, Pejë, Gjilan dhe Istog – grup ky që akuzoheshin për marrje ryshfeti, dhënie ryshfeti, keqpërdorim të pozitës zyrtare, ushtrim i ndikimit, dhe disa vepra të tjera. Pjesa tjetër e grupit vazhdon të jetë në paraburgim.
