Ferizaj- Gjykata Themelore në Ferizaj, të hënën ka shpallur aktgjykim lirues ndaj të akuzuarit Lutfi Menxhiqi, hetues në Drejtorinë për Hetime të Krimeve Ekonomike dhe Korrupsionit (DHKEK) në Prishtinë dhe kryeinspektori i Agjencisë për Regjistrimin Civil (ARC), në Ministrinë e Punëve të Brendshme, Arben Mustafa, ndërsa për të akuzuarin Skender Xhema (hetues në DHKEK) aktgjykim refuzues.
Aktgjykimi ndaj tre të akuzuarve është shpallur të hënën nga kryetari i trupit gjykues, gjyqtarit, Sahit Krasniqi, raporton “Betimi për Drejtësi”.
Sipas aktgjykimit, të akuzuarit Arben Mustafa i cili ngarkohej për “Ushtrim ndikimi”, ndërsa Lutfi Menxhiqi për “Keqpërdorimi i pozitës apo i autoritetit zyrtar” dhe “Marrja e ryshfetit” janë liruar nga akuza ngase nuk është provuar se të njëjtit kanë kryer veprat penale si në aktakuzë.
Ndërsa, për të akuzuarin Xhema është shpall aktgjykim refuzues pasi që prokurori Rasim Maloku ishte tërhequr nga ndjekja penale për këtë të njëjtin.
