Prokuroria Themelore e Prishtinës ka njoftuar se një femër në Lipjan është ndaluar pasi e njëjta dyshohet se ka kryer veprën penale “Lajmërimi apo kallëzimi i rremë”.
Bëhet e ditur se e dyshuara ka bërë raportim të rremë për dhunë në familje ndaj bashkëshortit të saj.
Ky i fundit është shpallur fajtor me vendim të Gjykatës, raporton Paparaci.
“Dyshohet se e njëjta ka bërë raportim të rremë pranë organeve të rendit, dhe atë më 21.04.2021, kundër bashkëshortit të saj, për veprën penale dhunë në familje, ndaj të cilit është zhvilluar procedurë penale dhe i njëjti është shpallur fajtor me vendim të Gjykatës kompetente”, njofton Prokuroria.
E dyshuara ka pranuar se ka bërë kallëzim të rremë pasi bashkëshorti i saj ka ushtruar kallëzim penal ndaj saj.
“Ndërsa, bashkëshorti i saj ka ushtruar kallëzim penal kundër të dyshuarës, për shkak të lajmërimit apo kallëzimit të rremë në polici, në vitin 2021 (rasti i lartcekur) dhe se në incizimin të cilin e posedon Prokurori i Shtetit, i ofruar si dëshmi nga tani i dëmtuari, e njëjta e pranon se në vitin 2021 ka gënjyer organet e hetuesisë me qëllim të përfitimit të dobisë pasurore për vete”, njoftohet tutje.
Prokurori i Shtetit ka paraqitur kërkesë për caktimin e masës së arrestit shtëpiak ndaj të dyshuarës, në Gjykatën kompetente.
