- Edhe pse punëtorët shpesh herë marrin lëndime trupore gjatë kohës që janë duke punuar, kompanitë vendore bëjnë shumë pak për përmirësimin e kushteve të punës. Si pasojë e kësaj janë të shpeshta rastet kur punëtorët kërkojnë ndihmë mjekësore në spital për shkak të lëndimeve të marra.
Një rast i tillë ka ndodhur mëngjesin e sotëm në Hanin e Elezit, ku një punëtor ka pësuar lëndime teksa po punonte në fabrikën e çimentos ‘Sharrcem’.
Burimet e Gazetës Sinjali brenda Emergjencës së Spitalit të Përgjithshëm në Ferizaj kanë bërë me dije se 49-vjeçari është dërguar atje për ndihmë mjekësore. Për shkak të natyrës së lëndimeve, i njëjti është transferuar në Qendrën Klinike Universitare të Kosovës në Prishtinë për trajtim të mëtutjeshëm mjekësor. Sipas burimeve, gjendja e tij shëndetësore është stabile dhe ai ndodhet jashtë rrezikut për jetë.
Ndërkohë për rastin është njoftuar edhe Policia të cilët bashkë me Inspektoratin kanë dalë në vendin e ngjarjes për të kryer ekzaminimet e nevojshme që ndihmojnë në zbardhjen e rrethanave të rastit.
Me urdhër të prokurorit, rasti është iniciuar ‘Asgjësimi, dëmtimi ose heqja e pajisjeve mbrojtëse dhe rrezikimi i sigurisë në punë’.
