Denver fitoi 119-108 ndaj Lakers në finalen e tretë play off të Konferencës së Perëndimit, duke udhëhequr 3-0 serinë e takimeve. Ndryshe nga dy sfidat e para, që ishin më të ekuilibruara, kjo u dominua nga Denver, që e meritoi fitoren.
Lakers pësuan humbjen e parë në shtëpinë e tyre në këtë fazë play off dhe tashmë janë me një këmbë jashtë, pasi vetëm një mrekulli do të përmbyste shifrat. Anthony Davis realizoi 28 pikë e 18 rebound, mbështetur edhe nga Reaves me 23 pikë e James me 23 pikë e 12 asist.
Gjithsesi, për Denver, dyshja Jokic-Murray ishte sërish “vrastare”. Murray realizoi 37 pikë, ndërsa Jokic 24, duke i dhënë fitoren skuadrës së tyre. Edhe ndeshja e katërt do të luhet në fushën e Lakers, që do të synojnë ta rihapin kualifikimin, nsdërsa Denver të shpallet kampion në Perëndim.
Një ngjarje jo e këndshme ka ndodhur për yllin e Lakers, LeBron James, i cili ka përplasur gjatë ndeshjes arbitrin duke e gjakosur atë në buzë. Gjyqtari veteran Foster e kaloi lehtë këtë gjë, teksa nuk ngurroi as të bënte shaka pas këtij incidenti.
