Kryetarja e partisë “Rruga Kombëtare” (RN) të Francës, Marine Le Pen, u tha mbështetësve të saj se nuk do të dorëzohej, pavarësisht se u shpall fajtore për përdorim të paligjshëm të fondeve të Bashkimit Evropian (BE) dhe u ndalua nga garimi në zgjedhjet e ardhshme.
Megjithatë, protestat masive kundër këtij vendimi nuk arritën përmasa të mëdha të dielën, në fjalën e saj drejtuar turmës, Le Pen e përsëriti qëndrimin se ky vendim është një akt politik dhe jo gjyqësor, transmeton Gazeta Papirus.
“Ky nuk është një vendim gjyqësor, është një vendim politik,” tha ajo.
Le Pen, e cila ishte liderja kryesore për zgjedhjet presidenciale të Francës në vitin 2027, u dënua nga një gjykatë pariziene për përdorimin e më shumë se 4.5 milionë eurove të fondeve të BE-së për të paguar stafin politik të partisë së saj nga viti 2004 deri në 2016, duke e paraqitur atë si asistentë të anëtarëve të Parlamentit Evropian.
Gjykata e dënoi Le Pen me një dënim prej katër vjetësh burg, dy prej të cilave u pezulluan dhe do të kryhen nën arrest shtëpie, si dhe një gjobë prej 100,000 eurosh.
Gjykatësja që drejtoi çështjen, Bénédicte de Perthuis, tha se veprimet e politikantes përbënin një sulm të rëndë dhe të qëndrueshëm ndaj rregullave të jetës demokratike në Evropë, por sidomos në Francë.
Le Pen ka njoftuar se do ta apelojë këtë ndalim, ndërsa Gjykata e Apelit të Parisit ka lënë mundësinë që të vendoset një vendim përfundimtar deri në qershor të vitit 2026. Nëse apeli i saj do të pranohet, ajo mund të garojë në zgjedhjet presidenciale të vitit 2027.
