Lidhja Demokratike e Kosovës ka akuzuar Qeverinë e Kosovës, se po ndëshkon komunat e Kosovës me shumë padrejtësi në ndarjet buxhetore për vitin 2023.
Sipas LDK-së, asnjë investim në 18 komuna vetëm sepse nuk kontrollohen nga pushteti.
Përmes një videoje të publikuar në Facebook, LDK-ja ka thënë se Qeveria po luan paturpësisht politikë me buxhetin e vitit 2023, duke shtuar se komunat po e paguajnë çmimin.
Sipas tyre 52 për qind e të gjithë buxhetit për projekte të reja këtë vit do të shkojë për tri komuna të udhëhequra nga partia në pushtet.
“Përmes komunave po ndëshkohen qytetarët. A është ky trajtimi që ata meritojnë”, thuhet në një postim të LDK-së, të cilët ia kanë bashkangjitur edhe një video.
LDK-ja ka thënë se 18 komuna nuk do të shohin asnjë cent nga investimet e reja nga buxheti i vitit 2023.
Sipas kësaj partie, kjo është fyerje për çdo qytetar që meriton trajtim të barabartë.
