Kryetari i Komunës së Rahovecit, Smajl Latifi ka shkruar rreth pajtimit të dy familjeve në Zaqisht të Rahovecit.
Statusi i tij :
Një ngjarje e mirë dhe e jashtëzakonshme, u pajtuan dy familje që ishin në hasmëri për 18 vjet.
Sot, isha i nderuar si pjesëmarrës dhe kontribues i një akti tejet njerëzor në fshatin Zaqisht, ku familja e Avdi Shalës bëri një vepër të vërtetë trimërie e humane, duke ia falur pa kushte gjakun e babait të ndjerë Sokol Shalës, familjes së Ibrahim, bacës Daim Shalës.
Ngatërresa që kishte shpjerë në vrasjen e Sokolit në 18 qershorin e vitit 2004, mori fund sot në xhaminë e fshatit, ku dy familjet zgjatën dorën e pajtimit në sytë e shumë bashkëfshatarëve, Kryetarit të AAK-së Ramush Haradinaj, deputetit Pal Lekaj, kryetarit të Suharekës Bali Muharremaj, deputetit Bekë Berisha, imamit të fshatit e personaliteteve të tjera, miq, familjarë e bashkëqytetarë.
S’kam se si të mos shpreh respekt e falënderim të thellë për familjen e Sokol Shalës, djemtë Avdiun dhe Besnikun, bashkëshorten e pesë vajzat si dhe vëllain e Sokoli të ndjerë, Bashkimin (Rokin), i cili bashkë më deputetin Pal Lekajn është angazhuar për pajtimin e kësaj ngatërrese shumëvjeçare.
Kontribut të madh dhanë edhe kusherinjtë, kryesia e fshatit, Haki Shala, Reshat Kabashi, Mejdi Kabashi, Jetulla Kabashi, Nuredin Gashi, Enver Kabashi si dhe Këshilli i Pajtimit, të gjithë ata që janë angazhuar për këtë qëllim.
Uroj që ngatërresat mes shqiptarëve të shuhen përgjithmonë! Popullit tonë i duhet bashkimi, e jo hendeqet e hasmëritë.
Vepra si kjo e familjes Shala, që sot e fali gjakun e kryefamiljarit, nderojnë kombin shqiptar dhe u japin shans zhvillimit dhe progresit!
Qofshi të nderuar e faqebardhë përjetë, familje e Avdi e Besnik Shalës!
SL
/Gazeta Papirus/
