Kryetari i komunës së Rahovecit, Smajl Latifi ka thënë se Masakra e Dubravës është një prej krimeve më mizore që shpërfytyron regjimin gjenocidial të Millosheviqit dhe shtetin serb.
Latifi ka shkruar në Facebook se deri tani asnjë urdhërdhënës apo ekzekutor i këtyre vrasjeve, nuk është dënuar.
“Thirrja jonë, e përcjellë edhe me angazhim konkret, duhet të jetë këmbëngulëse dhe kokëfortë për dënimin e krimeve çnjerëzore të shtetit terrorist serb mbi popullin shqiptar. Vetëm zbatimi i drejtësisë qetëson shpirtrat e familjeve dhe popullit që i përkisnin këta heronj e dëshmorë të kombit tone”, ka shkruar ai, përcjell Gazeta Papirus.
Postimi i plotë:
Masakra e Dubravës, 23 vjet më parë, do të mbahet mend si një prej krimeve më të llahtarshme të pushtuesit serb mbi shqiptarët. Kriminelët serbë nuk u mjaftuan që shqiptarët t’i mbanin të prangosur në burgjet e egra politike, por edhe nisën t’i vrasin, një nga një e duarlidhur.
Vrasja e 160 të burgosurve shqiptarë dhe plagosja e 300 prej tyre në burgun e Dubravës, është një prej krimeve më mizore që shpërfytyron regjimin gjenocidial të Millosheviqit dhe shtetin serb, që kreu qindra masakra dhe vrau barbarisht mbi 13 mijë civilë gjatë viteve të luftës 1998-’99 në Kosovë.
Asnjë urdhërdhënës apo ekzekutor i këtyre vrasjeve, nuk është dënuar as sot, ndonëse kanë kaluar më shumë se dy dekada nga ato ditë tmerri. Thirrja jonë, e përcjellë edhe me angazhim konkret, duhet të jetë këmbëngulëse dhe kokëfortë për dënimin e krimeve çnjerëzore të shtetit terrorist serb mbi popullin shqiptar. Vetëm zbatimi i drejtësisë qetëson shpirtrat e familjeve dhe popullit që i përkisnin këta heronj e dëshmorë të kombit tonë.
Lavdi të gjithë të rënëve në burgun e Dubravës!
Lavdi heronjve dhe dëshmorëve të kombit!
/Gazeta Papirus/
