Zyra e Bashkimit Evropian në Kosovë javë më parë kishte nominuar pesë persona për “Evropiani i Vitit 2022”, ndërsa në bazë të pëlqimeve nga publiku fituese u shpall Fahrije Hoti nga fshati Krushë e Madhe , të cilën sot e ka vizituar edhe kryetari i komunës së Rahovecit, Smajl Latifi.
Postimi i tij :
Zonja Fahrije Hoti është shpallur “Evropiania e Vitit 2022” në Kosovë nga Zyra e Bashkimit Evropian. Si grua që theu barrierat e stereotipet gjinore, ajo u shndërrua në frymëzim dhe inkurajim për shumë gra që të zhvillojnë potencialet dhe talentet e tyre, pavarësisht historive të trishta.
Historia e zonjës Fahrije nuk është aspak e lehtë. Ajo është një heroinë që u mbijetoi tmerreve të luftës dhe u ngrit në këmbë për familjen e gratë si ajo, përkundër mërzisë dydekadëshe për bashkëshortin e zhdukur në luftë, për fatin e të cilit nuk dihet as sot.
Fahrije Hoti nuk është ligështuar nga vështirësitë. Përkundrazi, ajo ka gjetur një kurajo të pashtershme për të qëndruar në këmbë dhe për të punuar për familjen e gratë e Krushës, duke krijuar vende pune në Kooperativën Bujqësore “Krusha”, të cilën e udhëheq. Sot, prodhimet e kësaj kooperative zënë vend edhe në tregjet e Bashkimit Evropian dhe në shtete të tjera të botës.
Rahoveci është krenar që e ka një grua si Fahrijen. E përgëzoj për sukseset e saj të vazhdueshme.
Urime, Fahrije Hoti!
/Gazeta Papirus/
