Siguria publike po cenohet nga krime të natyrave të ndryshme, duke përfshirë edhe rastet e vjedhjeve e grabitjeve. Hajnat shpesh bashkëveprojnë si grup dhe arrijnë të kryejnë të kapin para e gjësende me vlerë nga shtëpitë e bizneset e ndryshme. Për disa raste të tilla që kanë ndodhur muajt e fundit në Viti, Policia ka arrestuar dy persona të dyshuar, raporton Gazeta Sinjali.
Burimet nga Prokuroria kanë bërë me dije për Sinjalin se bëhet fjalë për Enis Shabiun (20-vjeçar) dhe Shabi Shabiun (23-vjeçar), të cilët janë arrestuar pas hetimeve të zhvilluara, që rezultuan me identifikimin e tyre.
Dy të rinjtë dyshohen për së paku gjashtë raste të vjedhjeve dhe vjedhjeve të rënda, që kanë ndodhur në tre muajt e fundit, në Viti. Pas arrestimit, të dyshuarit janë shoqëruar në stacion policor, ku gjatë intervistimit e kanë pranuar se kanë kryer veprat për të cilat dyshohen.
Me rastin e kontrollit policor nga ana e Policisë, janë gjetur dhe sekuestruar edhe gjësende të vjedhura nga të dyshuarit, që do të shfrytëzohen si dëshmi në procedurë.
Pas përfundimit të procedurave policore, me urdhër të Prokurorit të Shtetit të dyshuarit janë ndaluar për 48 orë dhe është zbuluar se në grupin e tyre ka qenë edhe një person tjetër, i cili është shpallur në kërkim.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
