Nuk janë të rralla rastet kur qytetarët përdorin dhunë fizike ndaj personave tjerë, e shpesh herë këto raste eskalojnë edhe në përdorim të armëve apo mjeteve të forta, duke u dashur me doemos ndërhyrja e Policisë për të zgjidhur problemet.
Një incident i tillë ka ndodhur sot në orët e para të mëngjesit në Zubin Potok, ku një person derisa po qëndronte në një lokal nate, është sulmuar brutalisht me një shishe qelqi në kokë.
Sinjali mëson ekskluzivisht se i dyshuari në lidhje me këtë rast është Ivan Arsic (rreth 36-vjeçar).
Viktima e këtij rasti është një person rreth moshës 27-vjeçare, i cili ka deklaruar në Polici se derisa po argëtohej me shokë në kafiterinë “Crypto”, i dyshuari e kishte goditur befasisht me një shishe qelqi në kokë, duke i shkaktuar lëndime të konsiderueshme.
Policia është vënë menjëherë në lëvizje dhe ka arritur ta ndalojë të dyshuarin në pikën kufitare në Bërnjak, derisa po tentonte të largohej nga Kosova.
Ai është shoqëruar në stacion policor për intervistim, mirëpo pas testimit ka rezultuar se kishte konsumuar alkool, aadaj intervista është shtyrë derisa të kalojnë efektet e dehjes.
Viktima ka pranuar ndihmë mjekësore në QKMF-në e Zubin Potokut dhe më pas ka dhënë dëshminë e tij në stacionin policor.
Në lidhje me rastin është njoftuar edhe Prokurori, me urdhër të të cilit i dyshuari është ndaluar për 48-orë.
Hetimet për zbardhjen e plotë të rrethanave të këtij incidenti janë duke vazhduar, ndërsa rasti është inicuar si “Lëndim i rëndë trupor”.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
