Kryetari i komunës së Rahovecit Smajl Latifi, ka bërë të ditur që Kuvendi i Komunës së Rahovecit ka miratu propozimin për themelimin e çmimit “Ukshin Hoti”,shkruan Gazeta Papirus
Postimi i plotë i Smajl Latifit
Kuvendi i Komunës së Rahovecit sot miratoi propozimin tim për themelimin e çmimit “Ukshin Hoti”.
Ky çmim do të ndahet për personalitete të shquara, familje emblematike dhe për ata që kanë kontribuuar për liri, dinjitet njerëzor e kombëtar. Çmimi mund t’iu jepet edhe të huajve që i kanë kontribuuar çështjes shqiptare dhe mbrojtjes së vlerave botërore civilizuese, por mund t’u ndahet edhe personave pas vdekjes (Post mortem).
Do të jetë nder për secilin që do ta pranojë këtë çmim, i cili ngërthen në vete vlera të larta morale e kombëtare, të përfaqësuara në figurën e veprimtarit dhe të intelektualit të shquar shqiptar Ukshin Hoti.
Jeta dhe veprimtaria e këtij veprimtari e intelektuali përmasash të mëdha është një simbiozë ndërmjet tij dhe popullit shqiptar. Ai merrte motiv nga qëndresa shqiptare për liri e bashkim, ndërsa populli ynë dimensionin e ri të stoicizmit dhe vendosmërisë për arritjen e qëllimeve të larta kombëtare. Kauza e kombit shqiptar u bë kauzë edhe e Ukshin Hotit, për të cilën dha gjithçka që pati. Ai përfaqëson dinjitetin njerëzor e kombëtar, guximin e vendosmërinë për të qëndruar stoik përballë dhunës e kërcënimeve serbe.
Përgëzoj anëtarët e Kuvendit Komunal, të cilët e votuan njëzëri këtë propozim, duke e bërë vendim. Jam shumë i lumtur që komuna e Rahovecit mund të nderojë njerëzit meritorë me këtë çmim që mban emrin e kolosit të kombit shqiptar, profesorit Ukshin Hoti.
/Gazeta Papirus/
