Kryeparlamentari Glauk Konjufca ka deklaruar sot gjatë seancës së Kuvendit se as ai e as kryeministri Albin Kurti s’kanë ndryshuar mendim për Oliver Ivanoviqin, duke thënë se ka qenë “kriminel”, raporton Express.
Pasi deputetët i kanë kërkuar llogari Kurtit për deklaratën që bëri në pesëvjetorin e vrasjes së Ivanoviqit, Konjufca u tha deputetëve që të mos humbin kohë duke u marrë me këtë çështje.
Mendimi im edhe i kryeministrit për z.Ivanoviq është i njëjti, mendoj unë. Ai që ka qenë gjithmonë. Asgjë nuk mund ta ndryshojë biografinë që e ka pas politike z. Ivanoviq. Përgjegjësia e tij në gjithë ato dëme që i janë shkaktuar popullit tonë është evidente dhe për këtë edhe është dënuar ai. Ne e kemi thënë haptas, haptas e kemi quajtur me emrin që i përket një njeriu që bën veprime të tilla dhe ai është dënu edhe është kualifiku me kategorinë e kriminelit, kështu që ky është edhe mendimi jonë. Po po kriminel, kriminel pa kurrfarë dyshimi. Tash asgjë nuk mund t’i heq kësaj që e ka vendos edhe gjyqësia e Kosovës, me aq sa di unë. Ne e kemi thënë shumë më përpara se ta vendoste gjyqësia këtë çështje. S’po e kuptoj pse po e humbin kohën me këtë çështje”, ka thënë Konjufca.
Ndryshe, Kurti e ka përkujtuar politikanin serb, Oliver Ivanoviq në pesëvjetorin e vrasjes, duke thënë se ai ishte person i përkushtuar ndaj komunitetit të tij dhe “i respektueshëm edhe ndaj atyre me të cilët nuk ishte dakord”.
“Sot ne përkujtojmë jetën dhe kujtimin e Oliver Ivanoviqit, në ditën e vdekjes së tij. Mendimet dhe ngushëllimet e mia janë me familjen dhe miqtë e tij. Oliver Ivanoviq ishte një person i përkushtuar për të luftuar për interesat e komunitetit dhe qytetit të tij. Ai e bëri këtë duke qenë i hapur, i sinqertë, gjithmonë i mprehtë në çështjet me rëndësi, por edhe i respektueshëm edhe ndaj atyre me të cilët nuk ishte dakord. Do të dëshiroja që kujtimi i tij të mbetet i gjallë, kujtimi i tij si një njeri që punoi për një të ardhme të qëndrueshme dhe për një Kosovë shumë etnike”, deklaroi Kurti.
