Kryeministri i Kosovës, Albin Kurti, e ka përmendur marsin si datën e fundit për arritjen e një marrëveshjeje finale me Serbinë.
Kurti një gjë të tillë e ka bërë të ditur në një intervistë për agjencinë ndërkombëtare të lajmeve ‘AFP’, përcjell Demokracia.com.
“Sipas Kurtit, Kosova tani po përballet me marsin si afat për të arritur një lloj marrëveshjeje me Serbinë, pavarësisht nga një mal me pengesa dhe mosmarrëveshje themelore që helmojnë edhe pamjen në dukje të marrëdhënieve mes kundërshtarëve”, thuhet në intervistën e AFP-së me Kurtin.
Pengesa jonë më e madhe është këmbëngulja dhe kërkimi i Beogradit për [një] makinë kohe. Ata duan të kthehen në kohë dhe kjo nuk është e mundur”, citohet të ketë thënë Kurti.
“Ne nuk mund të shantazhohemi. Nuk mund të kemi frikë. Ne jemi njerëz të guximshëm dhe ajo që kërkojmë është trajtim i drejtë, barazi dhe njohje reciproke”, i tha ai AFP-së.
Pas raportimeve për një presion të shtuar të emisarëve ndërkombëtarë, posaçërisht i atij të SHBA-së, Gabriel Escobar, Kurti e ka quajtur si “jo-të drejtë” presionin ndaj Kosovës.
“Nuk është fer t’i bësh presion mbi vendin më pro-evropian, pro-amerikan dhe demokratik në Ballkanin Perëndimor”, tha Kurti, duke shtuar se “presioni duhet të bëhet mbi Beogradin”.
