Kryeministri i Kosovës, Albin Kurti, në një intervistë për të përjavshmën britanike “The Sunday Times”, ka shprehur shqetësimin se gjyqi ndaj ish-krerëve të Ushtrisë Çlirimtare të Kosovës mund ta ndihmojë Serbinë të “rishkruajë historinë”, duke e zhvendosur fokusin nga krimet dhe mizoritë serbe gjatë luftës së fundit.
“Unë e mbështes llogaridhënien për luftën. Megjithatë, më duket e padrejtë që në qendër të vëmendjes po vihet Kosova, ndërsa Serbia jo vetëm që ka refuzuar të marrë përgjegjësinë për krimet e saj, por edhe i mohon ato”, tha Kurti.
Kurti në këtë intervistë tha se Rusia ka parë në Kosovë dhe në Ballkan një “front të dytë” të mundshëm kundër NATO-s pas pushtimit të Ukrainës. “Kosova është një histori suksesi e NATO-s, rusët duan që ajo të dështojë”.
Në dhjetor, kujtoi ai, një grup i madh anëtarësh të “Patrulla e Popullit”, një organizatë nacionaliste serbe me lidhje me grupin paramilitar rus “Wagner”, u grumbulluan përreth kufirit me Kosovën, duke kërcënuar se do të përballeshin me trupat e NATO-s.
“Njëqind milje nga vendi ku po bëjmë këtë intervistë në zyrën e kryeministrit është një bazë ruse”, shtoi Kurti, duke iu referuar të ashtuquajturës “qendër humanitare” të Moskës në qytetin serb të Nishit. “Është plot me spiunë dhe agjentë që angazhohen në luftë hibride”.
