Kryeministri i vendit, Albin Kurti, ka reaguar pasi policia ka shkatërruar tre laboratorë droge në veri të Kosovë, ku e la të hapur mundësinë për barrikada të reja e sulme ndaj policisë nga bandat kriminale.
Kurti, shkatërrimin e tre laboratorëve dje, e cilësoi si një fitore të qartë për sundimin e ligjit në vend.
“Policia e Kosovës ka shkatërruar dje 3 laboratorë ilegale të drogës në veri të Kosovës, një fitore e qartë për sundimin e ligjit. Bandat kriminale të sponsorizuara nga Serbia nuk do të ndalen para asgjëje – duke përfshirë barrikadat e armatosura dhe sulmet e dhunshme ndaj policisë – për të mbrojtur ndërmarrjet e tyre të paligjshme. Ata do të dështojnë”, ka shkruar Kurti në llogarinë e tij në Twitter.
Për tre laboratorët e drogës dje reagoi edhe ministri i Brendshëm, Xhelal Sveçla, i cili tha se vlera e llogaritur e sasisë së lëndës narkoktike dhe paisjeve është rreth 2.3 milionë euro.
“Profili i atyre që e ushtrojnë këtë veprimtari kriminale në veri të vendit tonë është i qartë: Paramilitarë e narkodilera. Këta po i mbron, mbështet dhe kur ju duhet i orkestron Presidenti i Serbisë Vuciq dhe pas tij ministri i mbrojtjes Vuceviq dhe Petkoviq”, tha Sveçla, shkruan Gazeta Online Reporteri.net.
Sveçla dje tregoi edhe emrat, që sipas tij, janë pronarët e tre laboratorëve, të cilët siç tha, janë përfshirë në sulmet ndaj zyrtarëve policorë në veri.
“8 laboratorë droge janë shkatërruar brenda mandatit tonë, vetëm sot janë shkatërruar 3 sosh. Pronarët e tyre: Miljan Delevic, Ivan Slavic, Dusan Slavic e Nikola Filgjokic, janë të përfshirë në sulmet ndaj zyrtarëve të Policisë së Kosovës, në ngritjen e barrikadave e në kërcënimet e sulmet ndaj serbëve që kanë refuzuar të bashkëpunojnë me ta”, tha ai.
