Në tubimin përkujtimor me rastin e 26-vjetorit të masakrës në Krushë të Vogël, kryeministri i Kosovës, Albin Kurti ka kërkuar nga organet e drejtësisë që kryerësit e krimeve në Kosovë të vihen para drejtësisë.
“Në pranverën e vitit 1999, Serbia po realizonte projektin e saj të errët dhe famëkeq serbomadh, duke zbatuar planin famëkeq të quajtur ‘Patkoi’ për shfarosjen e popullit në Kosovë. Në kuadër të këtij projekti gjenocidal, autoritetet serbe kishin planifikuar si teknikë të dëbimit dhe terrorizimit të popullsisë shqiptare çrrënjosjen e saj nga Kosova, duke kryer vrasje masive të civilëve të pafajshëm dhe të pambrojtur”, tha Kurti.
