Oda Ekonomike Gjermano-Kosovare njofton se mbrëmë, në 15-vjetorin e vendosjes së marrëdhënieve diplomatike mes Kosovës dhe Gjermanisë, ka organizuar një darkë festive.
Siç tregon OEGJK, në darkë, nga Qeveria e Kosovës ishin Kryeministri Albin Kurti, zëvendësi i tij, Besnik Bislimi dhe ministrat Liburn Aliu e Rozeta Hajdari.
Me Kryeministrin, përveç nga misioni diplomatik gjerman, darkuan edhe përfaqësues të organizatave gjermane. Mes tyre edhe përfaqësuesit e fondacionit Friederich Elbert Stiftung, të cilët së fundmi e kanë hartuar një draft-statut të Asociacionit të komunave me shumicë serbe në Kosovës.
OEGJ, në këtë përvjetor, ka bërë një përmbledhje të përkrahjes që Gjermania i ka bërë Kosovës nga çlirimi i saj prej Serbisë.
“Nga viti 1999 në Kosovë kanë ardhur 660 milionë euro përkrahje nga Qeveria Gjermane, teksa investimet e huaja direkte nga viti 2007 deri në vitin 2022 kanë kapur shifrën prej 1 miliard e 51 milionë euro. Adresë e parë për investitorët që vijnë nga Gjermania është Oda Ekonomike Gjermano-Kosovare, që me një anëtarësi prej 200 kompanive përbën një nga katalizatorët e bërjes biznes mes kompanive kosovare dhe gjerman”, thuhet në njoftim.
