Për nder të 14-vjetorit të Pavarësisë së Kosovës Kuvendi po mban seancë solemne.
Seanca ka filluar nga ora 11:00, ku aty do të flet presidentja Vjosa Osmani.
Në fillim kryetari Glauk Konjufca ka kërkuar që të gjithë deputetët të ngrihen në këmbë dhe ta nderojnë himnin dhe flamurin e Kosovës.
Këtu nuk mungoi ngritja në këmbë e liderit të VV’së, Albin Kurti dhe deputetëtve të kësaj partie, të cilët viteve të tjera as që merrnin mundin të ngrihen në këmbë.
Kurti madje e pate cilësuar si flamur i pompës së benzinës dhe lara-lara.
Për nder të 14-vjetorit të shtetësisë së Kosovës do të mbahen një sërë aktivitetesh të organizuara nga institucionet qendrore dhe ato lokale.
Ceremonitë për nder të kësaj dite do të fillojnë me ngritjen e flamurit shtetëror nga Garda Ceremoniale e FSK-së në oborrin e Zyrës së Kryeministrisë, në të cilin do të marrin pjesë presidentja Vjosa Osmani, kryetari i Kuvendit, Glauk Konjufca si dhe kryeministri Albin Kurti.
Manifestimi qendror do të jetë parakalimi i Forcave të Sigurisë së Kosovës dhe Policisë së Kosovës në sheshin “Nënë Tereza” në Prishtinë, ndërsa edhe Kuvendi i Kosovës do të mblidhet në seancë solemne.
Të gjitha Komunat kanë organizuar aktivitete që nisin me homazhe në nderim të dëshmorëve dhe martirëve si dhe janë paralajmëruar seanca solemne të Kuvendeve Komunale.
Mëngjesin e sotëm krerët e shtetit dhe përfaqësues të partive dhe institucioneve qendrore e lokale do të bëjnë homazhe te shtatorja e komandantit legjendar të UÇK-së Adem Jashari në Prekaz dhe Skenderaj, shtatorja e Zahir Pajazitit në Prishtinë, varrezat e dëshmorëve në Gllogjan, Reçak dhe te varri i ish-presidentit Ibrahim Rugova.
Krerët e vendit do të kenë edhe një pritje shtetërore me rastin e 14-vjetorit të pavarësisë së Kosovës në Pallatin e Rinisë në Prishtinë.
Gjatë ditës janë paralajmëruar edhe një sërë aktivitetesh sportive dhe kulturore në të gjithë vendin.
Ndryshe, të dielën e 17 shkurtit 2008 në orën 15:39 në Kuvendin e Kosovës u lexua Deklarata e Pavarësisë dhe Kosova u shpall e pavarur derisa në Ballkan u konfirmua edhe një shtet i ri. /gazetametro.net
