I dërguari i posaçëm i BE-së për dialogun Kosovë-Serbi, Miroslav Lajcak, do të jetë nesër në Prishtinë ku do të takohet me dy kryesuesit e Kosovës në dialog, kryeministrin Albin Kurti dhe zëvendësin e tij, Besnik Bislimi.
Lajmi është konfirmuar për media edhe nga Qeveria e Kosovës.
Kryeministri Kurti bashkë me zëvendëskryeministrin Bislimi priten të zhvillojnë nesër një drekë pune me emisarin Lajcak”, ka thënë Përparim Kryeziu, zëdhënës i Qeverisë për Reporteri.net.
Takimi me Lajcakun vjen në një kohë kur është rritur presioni nga komuniteti ndërkombëtar për arritjen e një zgjidhje në mes të Kosovës dhe të Serbisë.
Nga Ksoova po kërkohet që të themelohet Asociacioni i Komunave Serbe, ndërsa Kurti më 2 shkurt i ka prezantuar gjatë pika të cilat duhen zbatuar për t’u themeluar ai.
Lajçak e ka vizituar Kosovën 10 ditë më parë, kur ka zhvilluar një darkë pune me kryeministrin e Kosovës, Albin Kurti dhe kryenegociatorin e Kosovës në dialog me Serbinë, Besnik Bislimi.
