Kryeministri Albin Kurti është kujdesur sot ta çojë një mesazh në Twitter pas takimit me emisarin e BE-së, Miroslav Lajçak. “E pranojmë propozimin evropian për normalizimin e marrëdhënieve mes Kosovës e Serbisë”, shkroi Kurti , duke e vazhduar fjalinë “dhe e konsiderojmë bazë të mirë për diskutim të mëtejmë dhe si një platformë solide për të ecur përpara”.
Nuk dihet nëse diplomatët perëndimorë, të angazhuar për marrëveshje mes Kosovës dhe Serbisë, do ta trajtojnë këtë si pranim të Kurtit dhe ta cilësojnë si sjellje konstruktive të kryeministrit kosovar ndaj propozimit të tyre, edhe pse kryeministri e theksoi fort “pranimin” e planit.
Pranimin e planit Kurti e bëri në një drekë më Lajçakun ku i pranishëm ishte edhe zëvendësi i tij, Besnik Bislimi i cili vetëm një muaj më herët kishte thënë se ky plan më shumë i shkon për shtati Serbisë pasi që nuk e parasheh njohjen, shkruan Demokracia.com.
Duket se Kurtit po i bëjnë përshtypjet drekat dhe darkat pasi që pas tyre po njofton për vendime të mëdha.
Njëjtë kishte ndodhur edhe para dy jave në një darkë me Lajçakun ku prapë e kishte afër Bislimin.
Kësaj here ‘haberin’ se Kurti e pranon Asociacionin e kishte dhënë Lajçaku.
“U ktheva sot në Kosovë për të vazhduar diskutimet e mia të sinqerta, të hapura dhe intensive me Kryeministrin Albin Kurti dhe zëvendëskryeministrin Besnik Bislimi për hapat e ardhshëm dhe rrugën përpara për normalizimin e marrëdhënieve me Serbinë. Ne gjithashtu ramë dakord që të gjitha marrëveshjet e kaluara nga dialogu duhet të zbatohen plotësisht”, ka shkruar Lajçak pas darkës me dyshen Kurti-Bislimi. Fjalia “Ne gjithashtu ramë dakord që të gjitha marrëveshjet e kaluara nga dialogu duhet të zbatohen plotësisht” u kuptua se Kurti ka rënë dakord për Asociacionin.
Darkë të rëndësishme pati edhe më 4 maj të vitit të kaluar. Aso kohe në Berlin darkuan Lajçak, Kurti dhe Vuçiq. Fotografinë e darkës e pati publikuar emisari evropian. “Mirëpresim mundësinë për një darkë joformale diskutimi rreth dialogut me kryeministrin Kurti dhe presidentin Vuçiq në Berlin. Mirënjohës ndaj qeverisë gjermane për pritjen. Ne do të vazhdojmë diskutimin në nivel të kryenegociatorëve më 13 maj”, kishte shkruar Lajçak.
Shtrohet pyetja, se çfarë lajmi do të jap Kurti në drekën ose darkën e radhës…
