Politika ka ulje-ngritjet e saj, s’do mend. Ka edhe heqje dorë ndonjëherë nga parimet për interesat shtetërore, por jo kur ato thyhen skajshmërisht.
E kështu ka vepruar së fundi deputeti i PDK-së, Hisen Berisha.
Një nga kritikët më të mëdhenj të qeverisë Kurti, edhe gjatë kohës së skandalit “Martingate”, Hisen Berisha, duket të jetë rrëzuar nga “froni” i kritikave.
Jo vetëm kaq. Ai ka kaluar komplet në anën tjetër të diagramit, tani duke thurur elozhe për ambasadorin Berishaj, nga i cili mori dhuratë edhe një libër.
“Një pritje vëllazërore dhe bashkëbisedim nga aty ku ka mbetur, për të mirën e kombit, shtetit dhe historisë. Natyrisht, për punën e mirë në shërbim të vendit dhe avancimin e statusit të shqiptarëve në këtë shtet aleat. Pesha intelektuale dhe akademike e diplomatit e ngrit edhe subjektivitetin ndërkombëtar të shtetit. E në këtë korelacion, autoritetin dhe nderin i ke në nivelin më të lartë të vlerësimit. Ju faleminderit Ambasador për pritjen e dhuratën – librin“, shkroi ai.
Në anën tjetër, vetëm pak muaj më parë, ishte vetë Berisha që shpërndante pankartat opozitare të të rinjve të PDK-së, e që kishin të bënin ekskluzivisht me pasurimin e Martin Berishajt.
Por, çka t’i bësh, kaq e pati edhe kritika e Berishës…që u rrëzua përmes një libri dhuratë!
