Kryetari i PDK-së, Memli Krasniqi, ka përshëndetur përfundimin e punës për reformën zgjedhore.
Ai ka thënë se Komisionit Ad Hoc i Kuvendit për Reformën Zgjedhore ka bërë punë të madhe.
Sipas tij, në këtë komision janë tejkaluar dallimet partiake për të avancuar këtë segment vital të demokracisë.
“Për më shumë se një dekadë, Partia Demokratike e Kosovës ka qenë e hapur dhe e angazhuar për të reformuar sistemin zgjedhor në Kosovë, me qëllim të avancimit strukturor dhe përmbajtjesor të proceseve elektorale, si një parakusht për demokraci të qëndrueshme, pushtete të përgjegjshme dhe institucione të ligjshme. Mirëpres përmbylljen me sukses të propozimeve legjislative për realizimin e kësaj reforme dhe përgëzoj anëtarët e Komisionit Ad Hoc të Kuvendit për Reformën Zgjedhore, të kryesuar nga Shefi i Grupit Parlamentar të PDK-së, Abelard Tahiri, për punën e madhe, kohezionin politik e përkushtimin përtej partiak për të avancuar këtë segment vital të demokracisë”, ka shkruar Krasniqi në profilin e tij në “Facebook”.
Ai ka paralajmëruar se këto propozime shumë shpejt do të miratohen në Kuvendin e Kosovës.
“Kjo reformë tashmë është në procedura parlamentare dhe së shpejti do të miratohet për ti dhënë vulë përfundimisht vullnetit politik koncensual që e kemi arritur”, ka shkruar Krasniqi.
