Kryetari i Partisë Demokratike të Kosovës, Memli Krasniqi, ka folur pas arritjes së marrëveshjes mes Kosovës e Serbisë për çështjen e targave, raporton Gazeta Sinjali.
Në seancën e sotme të Kuvendit, Krasniqi ka përshëndetur marrëveshjen e arritur, teksa tha se është ndjerë keq kur lexoi mediat e rajonit të cilat raportuan se “Kryeministri i Kosovës Albin Kurti pranoi gjithçka çfarë kishte refuzuar të hënën”.
I pari i PDK-së deklaroi se ngjarjet e javëve të fundit, ishin dramë e shkaktuar nga kryeministri Kurti.
Përveç kësaj, ai e kritikoi kryeministrin se e bëri presidentin serb Aleksandar Vuçiç palë në diskutime që janë në ekskluzivitetin vendimmarrës të Qeverisë kosovare.
“Ke mundur ta marrësh këshillën që e kishe për më shumë se 5 javë. Fatkeqësisht duke mos bërë një gjë të tillë dhe duke u dorëzuar më vjen keq që ke shprehur një pafuqi të Kosovës duke mos mundur të implementosh vendimin për tabelat. Ke bërë edhe shpenzime të panevojshme për zgjedhjet. A do të kthehen serbët në institucionet e Kosovës? A do të ketë normalitet në veri siç ka qenë? Shpresoj e keni kuptuar që është koha për ta përfunduar dialogun”.
Ai u shpreh që plani i cili fillimisht u quajt franko-gjerman dhe tash plan evropian, nuk i adreson aspiratat shtetërore të Kosovës.
“Plani franko gjerman si draft aktual nuk i adreson aspiratat e Kosovës. Por angazhimi në negocimin e tij është i nevojshëm dhe ju inkurajoj ta bëni një gjë të tillë. Duke të inkurajuar për vendosmëri dhe fokus në arritje të marrëveshjes finale duhet t’i keni parasysh këto 5 shtylla. Ruajta e karakterit kombëtar, njohja formale nga 5 shtetet mosnjohëse, nisjen e procesit të anëtarësimit në NATO, marrjen e statusit të shtetit kandidat dhe njohjen e ndërsjellë me Serbinë”.
