Atë që Qeveria e Kosovës e quan “reformë”, Kryetari i Partisë Demokratike të Kosovës, Memli Krasniqi, e vlerëson si “rrënim”, shkruan Insajderi.
Duke folur në emisionin “Pressing”, Krasniqi vlerëson se në dy vite qeverisje të Lëvizjes Vetëvendosje është parë “padituria, moskompetenca, papërgitësia dhe paskrupulltësia” e kësaj administrate.
“Rrënim i sistemit të Administratës Publike përmes Ligjit për Zyrtarë Publik. Rrënim i sistemit të drejtësisë përmes Ligjit për Këshillin Prokurorial. Me rrënu ekonominë e vendit për përmmes Ligjit për Çmimet Tavan. Rrënim i arsimit përmes vendimeve arbitrare të Ministrisë. Secili veprim i tyre antikushtetues dihet në fillim që është antikushtetues”.
“Nuk është se këta nuk e dinë që është antikushtetues dhe e kanë bërë rastësisht. Ligjet kur i kanë shkru i kanë shkru duke e ditë që janë në kundërshtim me kushtetutën. Dhe, realisht kjo të bën me i bë dy pyetje. A janë qaq të paditur, apo qaq të paskrupullt që s’ju intereson”, tha Memli Krasniqi.
Kryetari i PDK-së konstaton se “këta [Qeveria e Kosovës] janë absolutisht të padijshëm”. “Më s’ka asnjë arsyetim. Janë aq të paditur e aq jo kompetent, aq të papërgitur për të qeverisur saqë ne mund të flasim me javë të tëra që këta bëjnë në baza ditore”.
“Por, janë edhe të paskrupullt sepse realisht me pas këtë qasje ndaj Kushtetutës, ndaj ligjeve aktuale, ndaj të gjitha kategorive shoqërore, ndaj krejt grupeve, është një nivel i konsiderimit të superioritetit, një kompleks superioriteti që këta e kanë ndaj krejt neve tjerëve”.
“Padijenia dhe paskrupulltësia nuk janë të ndara. Kjo mungesë e kompetencës, performancës, sukseseve është ravijëzuar në çdo fushë. Dy vjet qeveri, vetëm dy minuta fola. Me këta s’ke çka fol, këta janë në botërat e veta dhe në xhipat e zi, këta nuk janë me qytetarin. Pyeteni cilin doni, kur jeni kanë te njerëzit, nëpër familje, nëpër shtëpijat e njerëzve”, tha mes tjerash Memli Krasniqi.
