Kryetari i Partisë Demokratike të Kosovës, Memli Krasniqi po vazhdon të “rezistoj” në lidhje me marrëveshjen e dakorduar nga kryeministri Albin Kurti në Bruksel, e që është propozim evropian.
Edhe pas takimit me ambasadorin amerikan, Krasniqi ka thënë se kjo marrëveshje është mundësi e humbur.
Ai këto rezerva i ka thënë se ia ka shprehur edhe vetë ambasadorit.
Kujtojmë se ambasada amerikane pak ditë më parë i kritikoi ashpër PDK-në e LDK-në për qëndrimet e tyre në lidhje me marrëveshjen e Brukselit.
Postimi i plotë i Krasniqit:
“Sot, në selinë e Partisë Demokratike të Kosovës, kam pritur ambasadorin e SHBA-ve, Jeffrey Hovenier. Bashkë kishim një diskutim miqësor dhe konstruktiv në raport me zhvillimet e fundit politike në vend.
Ambasadorit Hovenier i shpreha edhe një herë qëndrimin e PDK-së në lidhje me dialogun Kosovë – Serbi dhe rezervat tona në raport me propozimin evropian tashmë të pranuar nga Kryeministri Kurti. Për ne, kjo marrëveshje është e pamjaftueshme dhe një mundësi e humbur për të arritur një marrëveshje finale, gjithëpërfshirëse dhe me njohjen e ndërsjellë në qendër.
Përkundër mbështetjes që PDK i ka dhënë Kryeministrit Kurti për dy vjet me radhë në procesin e dialogut dhe në raport me Serbinë, përmes gabimeve e veprimeve kryeneqe dhe në shpërputhje me kontekstin politik, ai ka dështuar që të arrijë përmbushjen e qëllimeve shtetërore të Republikës së Kosovës.
Ambasadorin Hovenier e falënderova për vizitën dhe mbështetjen e vazhdueshme të SHBA-ve për Kosovën, si dhe e sigurova që PDK gjithmonë do të veprojë në përputhje ne interesin shtetëror dhe qytetar të Kosovës”, ka shkruar Krasniqi.
