Gjatë qëndrimit në Dublin, Krasniqi ka takuar liderë të partive të ndryshme anëtare të ALDE, deputetë të Parlamentit Europian dhe ka marrë pjesë në takimet e LIBSEEN, ku PDK është pranuar si anëtare me të drejta të plota para pak kohësh.
PDK-ja përmes një njoftimi për media ka bërë të ditur se Krasniqi ka diskutuar edhe në mbledhjen e Këshillit të ALDE-së, që është organi më i lartë vendimmarrës i kësaj organizate.
Në fjalimin e tij para anëtarëve të Këshillit të ALDE, Krasniqi ka diskutuar për situatën politike në Kosovë, aspiratat evropiane të vendit tonë, si dhe ka prezantuar zhvillimet dhe reformat në Partinë Demokratike të Kosovës.
“Ballkani Perëndimor në përgjithësi dhe Kosova në veçanti, duhet të përfshihen në planet për krijimin e një Evrope të bashkuar kundrejt sfidave aktuale që po vijnë kryesisht nga Rusia dhe shtetet e tjera që nuk ndajnë të njëjtat vlera qytetëruese.”, ka thënë ai.
Në këtë Kongres, kreu i PDK-së Memli Krasniqi ka paraqitur edhe vullnetin e Partisë Demokratike të Kosovës që të bëhet pjesë e Aleancës së Liberalëve dhe Demokratëve të Evropës, si parti me të drejta të plota.
