Ministrja e Punëve të Jashtme në detyrë, Donika Gërvalla, ka njoftuar se ka mbajtur një ligjëratë në një universitet në Paris, e ftuar nga deputeti i zgjedhur, Nezir Kraki.
Gërvalla ka theksuar se gjatë ligjëratës është diskutuar për marrëdhëniet e Kosovës me Bashkimin Evropian.
Ajo shtoi se studentët kanë shprehur një interesim të madh për të vizituar Kosovën, madje disa prej tyre janë të interesuar të kryejnë praktikë atje.
“Në bashkëbisedim me studentët, theksova se Kosova mbetet një histori suksesi në Ballkan, një vend që ka dëshmuar përkushtim ndaj vlerave evropiane, ndërtimit të institucioneve të qëndrueshme dhe forcimit të demokracisë. Megjithatë, procesi i integrimit nuk është vetëm një synim për ne, por edhe një domosdoshmëri për vetë Evropën, e cila nuk mund të jetë e plotë pa Ballkanin Perëndimor.
Ishte mbresëlënëse të shihja sa shumë interes dhe kuriozitet kanë studentët e këtij institucioni për Kosovën dhe rajonin tonë. Diskutimi ishte i gjallë, me pyetje të mprehta dhe debate të vlefshme mbi dinamikat gjeopolitike dhe perspektivën evropiane. Sikurse vitin e kaluar, edhe këtë verë shumë studentë të prof. Krakit shprehën interesim për të ardhur në Kosovë dhe për të kryer një praktikë dy mujore” – ka shkruar Gërvalla në një postim në Facebook.
