Në mesnatë Komisioni Qendror i Zgjedhjeve ka mbyllur afatin për subjektet politike që të aplikojnë për certifikim dhe t’i dorëzojnë listat e kandidatëve për deputetë.
25 subjekte politike dhe mbi 1280 kandidatë kanë aplikuar në KQZ që të marrin pjesë në zgjedhjet e 9 shkurtit.
Zëdhënësi i KQZ-së, Valmir Elezi ka thënë se do të kërkojnë nga institucionet kompetente që të bëjnë verifikimet e nevojshme sa u përket kandidatëve.
“Me qëllim të zbatimit të 30 të Ligjit Nr. 08/L-228 për Zgjedhjet e Përgjithshme, Komisioni Qendror i Zgjedhjeve do të kërkojë nga institucionet kompetente të bëjnë verifikimet e nevojshme për përshtatshmërinë apo aftësinë e kandidatëve për t’u certifikuar për pjesëmarrje në zgjedhje.”
KQZ ka një kërkesë edhe nga Paneli Zgjedhor për Ankesa dhe Parashtresa
“Gjithashtu, ky nen specifikon që kandidat nuk mund të certifikohet një person i cili është zyrtar i Panelit Zgjedhor për Ankesa dhe Parashtresa; me anë të vendimit të gjykatës, përfshirë edhe vendimin e PZAP-it, i është hequr e drejta për të qenë kandidat; ka dështuar të paguajë gjobën e vënë nga PZAP-i, apo KQZ-ja; ose ka dështuar t’i përmbahet ndonjë urdhri të PZAP-it. Prandaj, kemi kërkuar nga PZAP-i të bëjë verifikimet në raport me këto kufizime ligjore”, tha Elezi për Express.
Ndërsa vetë KQZ do të verifikojë që kandidatët nuk janë kryesues apo anëtarë të KQZ-së Komisionit Komunal të Zgjedhjeve.
