Kryetari i Kuvendit, Glauk Konjufca teksa foli për moskalimin e Kodit Civil në Kuvend, tha se është e pafalshme dhe e turpshme nëse grupi LGBTI konsiderohen jonjerëz apo gjysmë njerëz.
“Në të vërtetë, çka ka ndodhë në Kuvendin e Kosovës atë ditë, unë e ndaj në dy aspekte. Në aspektin normal dhe në aspektin e pafalshëm, çka ka ndodhë. Aspekti normal është kjo, është shoqnia me qenë e ndame për këtë temë, sepse kjo është temë fort specifike dhe vetëm pak shoqëri shumë të zhvilluara të vendeve demokratike, e kanë kalu ndarjen e ashpër, kanë shku në kuotat 70% mbi 70%. Në shoqëritë që janë pak më të brishta, është shumë e ashpër, është 50-50…Seanca e ka pas edhe një pjesë të pafalshme, kur ti nuk mjaftohesh me thanë s’po pajtohna, por ti tani thu a e din pse s’pajtohna unë, se unë mendoj që këta nuk janë njerëz hiç, kjo kategori e njerëzve që e zgjedhin orientimin e tyre seksual, ose ju thu janë gjysmë njerëz, ose janë të sëmutë. E qajo është e pafalshme, bile e turpshme për mendimin tim, sepse unë konsideroj se me vlerat ma elementare bazike njerëzore e para, e dyta me konventat më të konsoliduara ndërkombëtare që e mbrojnë pa kurrfarë dileme integritetin e njërit, unë mendoj që dinjiteti dhe intigriteti i atyre njerëzve përmes kësaj gjuhe cenohet dhe sulmohet dhe unë e kam për detyrë me i mbroj të gjithë njerëzit që janë subjekt i të drejtave”, tha Konjufca në KTV.
Sipas tij, arsyeja kryesore përse nuk ka kaluar Kodi Civil, është pikërisht neni për komunitetin LGBTI.
“Kodi Civil nuk kaloi për shkak se si e pati numrin ai, pak të ndërlikuar 1369 a si, se s’po e mbaj mend numrin. Mirëpo, ai nen i cili e është nen specifik, mendoj që ka qenë arsyeja kryesore pse nuk ka kalu Kodi Civil. Unë mendoj që është gabim me reduktu Kodin Civil me atë nen, unë mendoj që ai nen e përbën 0.00 diçka për qind të Kodit Civil dhe çështjet shumë të rëndësishme që i rregullon ai. Por, në të njëjtën kohë jam i mendimit që ai e prek dhe tenton me rregullu një të drejtë po ashtu të rëndësishme”, u shpreh Konjufca.
