Komuna e Mitrovicës në bashkëfinancim me organizatën “IADK”, gjatë ditës së sotme kanë bërë shpërndarjen e granteve në formë të mjeteve bujqësore për 10 përfitues të cilët janë përkrahur me serra, motokultivatorë me frezë dhe fidane të perimeve.
Në këtë ceremoni të ndarjes së pajisjeve bujqësore, i pranishëm ishte kryetari i komunës, Bedri Hamza, drejtori i Drejtorisë për Bujqësi dhe Zhvillim Rural, Ferdi Kadriu si dhe drejtori ekzekutiv i IADK-së, Zenel Bunjaku.
Në fjalën e tij, kryetari Bedri Hamza, pasi uroi përfituesit e grantëve dhe falënderoi organizatën e IADK-së, theksoi se në Komunën e Mitrovicës do të ketë rritje të subvencioneve në bujqësi dhe se sektori i bujqësisë do të trajtohet me prioritet gjatë qeverisjes së tij.
Në anën tjetër, drejtori i IADK-së, Zenel Bunjaku, falënderoi përfaqësuesit e Komunës së Mitrovicës për bashkëpunimin dhe korrektësinë dhe theksoi që përmes këtyre granteve në formë të pajisjeve, përfituesit do të arrijnë të jenë më produktiv në punën e tyre.
Këto grante janë dhënë nga Zyra e Bashkimit Evropian në Kosovë përmes Iniciativës për Zhvillimin e Bujqësisë së Kosovës (IADK), në vlera prej 3000 deri 5000 euro në formë të pajisjeve, për përfituesit e komunës së Mitrovicës, në kuadër të projektit “Mbështetja e punësimit të të rinjve dhe grave në zonat rurale përmes zhvillimit të bujqësisë”.
