Komuna e Lipjanit ka organizuar akademi përkujtimore për shënimin e 24-vjetorit të rënies së martirëve të kësaj komune.
24 vjet më parë në fshatin Sllovi për dy ditë, më 15 dhe 16 prill 1999, forcat serbe vranë 45 civil. Në Ribar të Vogël, më 18 prill 1999, nga forcat ushtarake, militare e paramilitare serbe në këtë fshat vranë 25 civil. Në Hallaq të Vogël, më 19 prill 1999, forcat ushtarake, policore e paramilitare pushkatuan e vranë 20 civil. Në prill te vitit 1999 po ashtu u vranë edhe martirë nga Tërboci, Akllapi e Blinaja.
Kryetari i Lipjanit, Imri Ahmeti, tha se edhe pas 24 viteve pesha e dhembjes shtohet, por sipas tij, shtohet edhe vlera e veprës për liri dhe sakrificë.
“Nuk mund t’i shmangemi rikujtimi të atyre ditëve të prillit, të prilli të përgjakur, kur dhunë, vrasjet përfshinë fshatrat tonat. Vitet kalojnë, tani 24 vite, pesha e dhembjes vjen e shtohet, siç shtohet vlera e veprës për liri dhe sakrificë. Ata vetëdijshëm u flijuan. Dita si kjo përveç kujtimit të së kaluarës, duhet të na shërbejë si punë e mirë, si vlerës sublime e lirisë. Nderimi më i madh i bëhet të gjithë martirëve të kombit tonë, duke punuar pastër dhe pa hile. Më e pakta që mund të bëjmë për dëshmorët dhe martirët është shënimi i datave si kjo. Ndonëse vendi ynë është i pavarur dhe sovran, vendi ynë akoma ka nevojë të punojmë. Qasja e të gjithë neve duhet të jetë përtej individuales, përtej politikës sonë ditore”, tha Ahmeti.
Feim Ismajli, përfaqësues i fshatrave tha se janë mbledhur që ti kujtojnë 21 dëshmorët, 170 martirët që u vranë në mënyrë mizore nga ushtria serbe.
“Sot u bënë 24 vite kur forcat serbe vranë edhe masakruan një popullatë të pa mbrojtur dhe të pa fajshëm. Jemi mbledhur se bashku që ti kujtojmë 21 dëshmorët, 170 martirët që u vranë në mënyrë mizore nga ushtria, policia dhe paramilitarët serb. Nën kërcënimin e dhunës serbe për pastrim etnik u dëbuan me dhunë gjysma e popullatës shqiptare” tha Ismajli.
Feriz Gërbeshi, përfaqësues i familjeve Sllovi, tha se nuk mund të pajtohen me heshtjen e institucioneve që akoma nuk kanë bërë një padi për krimet që ka bërë Serbia.
“Ne familjarët e tri masakrave nuk di te pajtohemi as një here me heshtje e institucioneve përgjegjëse që ende nuk kanë arritur të ngrejë një padi me të gjitha ato fakte. Ato fakt po humbasin, po vdesin e po veniten. Ne nuk do të ndalemi kurrë duke kërkuar drejtësi, deri në dënimin e tyre. Nëse sa do pak dëshironi që ta dërgoni amanetin e tyre në vend punoni që të jemi një vend shembull”, tha Gerbeshi./eo/
