Misioni i KFOR-it i drejtuar nga NATO ka shprehur qëndrimin se çdo vendim për hapjen e mundshme të urës së lumit Ibër në Mitrovicë për automjete duhet të merret përmes dialogut dhe në koordinim me komunitetin ndërkombëtar.
Në një video-deklaratë për media thuhet se KFOR-i është i fokusuar që të kontribuojë për një mjedis të sigurt për të gjithë njerëzit dhe komunitetet në Kosovë dhe lirinë e lëvizjes, në çdo kohë dhe në mënyrë të paanshme.
“Në ndërkohë, KFOR-i do të mbajë prezencën e tij fikse në urë dhe do të vazhdojë të kryejë patrullime të rregullta në zonat përreth. Së fundmi, disa aktivitete trajnuese janë kryer nga personeli i KFOR-it në urë. Këto ishin pjesë e aktiviteteve tona të rregullta të krijuara për të testuar procedurat operacionale afatgjatë dhe për të ruajtur standardin më të lartë të gatishmërisë së trupave tona. KFOR-i vazhdon të monitorojë situatën. Ne jemi të vendosur mirë për të adresuar çdo skenar sigurie dhe për të vazhduar zbatimin efektiv të mandatit tonë të OKB-së”, ka thënë një zëdhënës i KFOR-it./KP
