Kryeministri i Kosovës, Albin Kurti, po qëndron për vizitë zyrtare në Kroaci, ku është pritur nga homologu i tij kroat, Andrej Plenkoviq.
Fillimisht, në një takim të përbashkët dhe pastaj me delegacionet përkatëse, kryeministri Kurti dhe kryeministri Plenkoviq kanë biseduar rreth marrëdhënieve të shkëlqyeshme bilaterale ndërmjet shteteve dhe popujve të dy vendeve.
Përmes një njoftimi nga Qeveria, është bërë e ditur se ata kanë diskutuar për marrëveshjet që janë nënshkruar sot dhe për marrëveshje të reja të mundshme që do ta zgjeronin bashkëpunimin në fushën e sistemit të drejtësisë, kulturës dhe arsimit.
Siç bëhet e ditur, në Kroaci u nënshkrua zotimi për Themelimin e Qendrës për Studime Albanologjike “Milan Šufflay” në Universitetin e Zarës. Qendra për Studime Albanologjike “Milan Šufflay” do të shërbejë si një platformë hulumtuese për promovimin e gjuhës, historisë, arkeologjisë dhe kulturës shqiptare, duke i kushtuar një vend të veçantë trashëgimisë së veprës së historianit dhe albanologut të shquar Milan Šufflay.
Po ashtu, temë diskutimi ishte edhe bashkëpunimi ekonomik dhe shkëmbimet tregtare, me ç’rast diskutuan për mundësitë dhe fushat me potencial për investime të huaja.
Kryeministri Kurti e ka njoftuar homologun e tij për ofertën e Kosovës për investitorë të huaj, krahas zhvillimit të qëndrueshëm ekonomik, përparimit demokratik, stabilitetit institucional dhe përmirësimit në sundimin e ligjit që ka shënuar vendi në vitet e fundit.
Në fund të takimit, u nënshkruan marrëveshje për:
-Sigurimet shoqërore dhe Protokollin zbatues;
-Njohjen dhe shkëmbimin e patentave të shoferëve;
-Bashkëpunimin në mbrojtjen kundër fatkeqësive natyrore, teknike dhe teknologjike;
-Memorandumin e Mirëkuptimit për bashkëpunim mes agjencive tona të forenzikës;
-Memorandumin e Mirëkuptimit ndërmjet Akademisë Policore të Kroacisë dhe Akademisë së Kosovës për Siguri Publike për forcimin e bashkëpunimit në fushën e arsimit dhe kërkimit shkencor.
