Mosmarrëveshjet mes qytetarëve shpesh herë përcillen me ofendime e kërcënime ndaj njëri-tjetrit. Madje nuk janë të rralla rastet kur ato shpërthejnë në dhunë, duke u përleshur fizikisht mes vete. Kështu ka ndodhur edhe mbrëmë pas mesnatës, në një lokal në rrugën “Gasper Karaqi” në Gjakovë, ku pas një përleshjeje fizike mes dy grupeve, dy persona kanë mbetur të lënduar.
Rasti ka ndodhur në një lokal në Gjakovë, ku pas një zënke mes dy grupeve, janë përdorur mjete të mprehta, sikur edhe thikat.
Sinjali mëson ekskluzivisht se gjashtë të dyshuarit në lidhje me këtë rast janë: Gj.N (rreth 26-vjeçar), Gjinson.N (rreth 24-vjeçar), N.N (rreth 30-vjeçar), Sh.B (rreth 35-vjeçar), A.A (rreth 34-vjeçar) dhe B.H (rreth 33-vjeçar).
Ndërkaq, viktimat e këtij rasti janë A.H (rreth 31-vjeçar) dhe H.H (rreth 34-vjeçar), të cilët kanë pësuar lëndime të rënda trupore dhe janë dërguar menjëherë në QKUK në Prishtinë për trajtim të mëtejshëm mjekësor.
Prokurori ka urdhëruar ndalimin e të gjithë të dyshuarve, ndërsa rasti është cilësuar si “Vrasje në Tentativë” dhe veprimet hetimore janë në zhvillim.
